Dalaw sa CPDRC gibalik

CEBU, Philippines — Sukad kagahapon nabalik na ang dalaw sa mga piniriso sa Cebu Provincial Detention and Rehabilitation Center.

Si Audesti Miguel, ang assistant jail warden sa CPDRC, nagkanayon nga human sa ilang evaluation nga gihimo, ilang gibalik ang dalaw sa dili mominus 3,500 ka piniriso gawas sa cell number 26 ug 98 nga nakuhaan og duha ka pakete sa shabu atol sa greyhound operation sa niaging semana.

Ang duha ka selda adunay dili mominus 60 ka piniriso.

Gitataw sab ni Miguel nga ang paglibkas sa suspension sa dalaw walay kalabutan sa pamahayag ni kanhi bokal Grecilda “Gigi” Sanchez kinsa nihulagway nga dili makatarunganon ang pagsuspenso sa dalaw tungod lang sa cellphone sa iyang igsuon.

Si Sanchez nibutyag nga nakadawat siya og mensahe gikan sa iyang igsuon nga si Leodegreco “Greco” Sanchez nga anaa sulod sa prisohan.

Si Sanchez kinsa nibisita sa buhatan sa gobernador niadtong Miyerkules nagkanayon nga nagpasalamat siya sa pagsabot sa gobernador sa sitwasyon niya ilabi na nga siya naguol sa seguridad ni Greco sulod sa prisohan human nasuspenso ang dalaw.

Si Miguel nitataw nga walay special treatment nga gihatag ang CPDRC ngadto kang Greco nga karon gibartolina human nakuhaan og cellphone. (BANAT NEWS)