Road-sharing sa Ban-Tal tun-an alang sa rota sa BRT
CEBU, Philippines — Gitun-an na sa kagamhanan sa siyudad sa Sugbo ang road-sharing scheme diha sa Banilad-Talamban corridor kun diin ang Bus Rapid Transit masagol sa mga pribadong sakyanan.
Gibutyag ni City Administrator Engr. Nigel Paul Villarete gitahasan siya ni Cebu City Mayor Tomas Osmeña pag-review ug pagbisita og balik sa Ban-Tal section.
“I will draft a communication to the DOTr (Department of Transportation) for a preferred implementation methodology and timeline that would give the least disruption to traffic flow,” matud ni Villarete.
Si Villarete nga usa usab ka urban planner miingon ilang tan-awon ang gilapdon sa karsada, kapasidad, sumasakay, modal split, road right of way requirement ug uban pa.
Apan si Cebu City Mayor Tomas Osmeña mas gusto niya may kaugalingong lanes para lang sa BRT inay nga mag road sharing sa Ban-Tal.
“I don’t like the shared system. Let the people decide. I think it’s good enough that we have dedicated lanes up to certain point and there’s no need for sharing,”sigon ni Osmeña.
Sigon ni Villarete mahimo siyang mopadala og suwat sa DOTr maghangyo alang sa dedicated lane sa Ban-Tal.
Si Atty. Rafael Christopher Yap, pangulo sa BRT Implementation Unit miingon motabang usab kini sa pagpaabot ngadto sa DOTr sa gusto sa mayor.
Nagtinguha silang masugdan ang konstruksiyon niini sa sunod tuig ug gipaabot nga makompleto ang tanan 2019 o kaha sayong bahin sa 2020 aron makadagan ang BRT sa tuig 2021.
Sila si Konsehal Raymond Garcia, Joel Garganera ug James Anthony Cuenco mihangop sa gusto sa mayor nga dedicated lane sa 21-kilometer route sa BRT.
Kun mahimutang na ang tanan ang bus magdagan sa nag-unang kadalanan sa siyudad sama sa N. Bacalso Avenue, South Road Properties, Osmeña Boulevard, N. Escario Street ug Governor Cuenco Avenue. (BANAT NEWS)
- Latest