Kapin 100 ka armas gitahan

CEBU, Philippines — Usa sa mga notadong hitman sa lungsod sa Ronda mitahan samtang kapin usa ka gatos ka mga klase-klaseng mga armas nga napaso na ang mga lisensiya ug ang uban wala gyuy mga lisensiya ang gitahan ngadto sa kapolisan.

Ang mayor sa maong lungsod nga si Mayor Mariano Yap Blanco usa sa mga mitahan sa iyang duha ka mga Armalite rifles ug usa ka shotgun samtang si Bise Mayor Jona John Ungab mitahan sa iyang M14 Rifle ug kalibre .45 nga pistola.

“Allowed man mi to possess (og firearm) as the local chief executive ang officials sa lungsod kay allowed man,” pangatarungan sa maong mayor.

Base sa balaod, ang mga elected officials mahimong makabaton og armas basta kini mosunod sa mga rekisitos ug lisensiyado.

Ang bag-ong hepe sa kapulisan sa Asturias kinsa mao usab ang hepe sa Provincial Intelligence Branch (PIB) nga si Police Supt. Joie Pacito Yape mibutyag  ang maong mga armas resulta sa usa ka buwan nilang Oplan Katok.

Ang maong oplan mao ang pagsubay sa mga kaniadto lisensiyadong mga armas nga wala na gi-renew diha sa Firearms Explosive Security Agency and Guards Supervision (FESAGS).

 Si Jerrick Torres alyas A-ay 32 anyos ug residente sa barangay Malalay, lungsod sa Ronda, giila nga usa ka gun for hire sa maong lungsod ug miangkong daghan na og mga napatay. Siya mitahan og usa ka taas nga armas ug usa ka kalibre .45 pistola.

Matud pa sa mayor nga daghan na ang napatay si Torres gumikan na sab sa duha ka nagbangi nga pamilya sugod niadtong tuig 2005.

Samtang, wala pa mitahan sa kapolisan ang paryente ni Torres nga si Fransisco Omboy alyas Jekjek nga iyang kontra kaniadto nga usa usab sa mga daghang napatay nga ila rang kaparyentihan.

Mitug-an si Lita, inahan ni Omboy nga nagsugod ang tanan dihang gipatay ang igsuon sa iyang bana ug niadtong niaging adlaw lang usab gipatay ang iyang anak.

Samtang usa ka kagawad sa Barangay Climaco sa Toledo City ang gidakop  human nakuhaan og mga armas nga way lisensiya pinasikad sa search warrant kagahapon sud sa usa ka establisamento sa Barangay Cambang-ug.

Ang maong warrant pinirmahan ni Judge Jerry Dicdican sa Regional Trial Court branch 25 sa Dakbayan sa Toledo batok ni kagawad Antonio Yumol Canonigo.

Nakuha gikan kang Canonigo ang usa ka bag-o nga Cobra Sarsilmaz shotgun, mga bala niini, usa ka .9mm pistol, magazines ug bala ingon man lima ka mga bala sa kalibre .45 pistola.

Nadakpan sab ang duha ka mga sakop sa maong kagawad nga silang Ceperino Caray Sanchez ,48, ug si Victor Juarez Cabusas ,36, nga nakuhaan og tagsa-tagsa ka mga armas. (BANAT NEWS)