Simbahan kinahanglan bantayan

CEBU, Philippines - Nakakuha og leksiyon ang simbahan sa nahitabong paglungkab sa donasyon nga kwarta sa St. Joseph Parish sa Mabolo, Cebu City.

Matud ni Archbishop Jose Palma nga kinahanglang hatagan og pagtagad sa mga kura paruko ang seguridad sa simbahan lakip ang pagpaubos sa training sa mga ginsakopan niini.

Kinahanglan sab magmabinantayon ang katawhan ug mohimo og mga pagpangandam.

Nalooy si Palma sa batan-ong suspek nga si Alexander Lumapac sanglit pipila lang ka libo ang nakuha niini apan naguba ang iyang kaugmaon nga unta mas daghan pa siya og matigum nga kwarta alang sa maayong kinabuhi.

Sugyot ni Palma nga dili magpundo og dagkong kwarta sulod sa simbahan.

Sa laing bahin, gilungkab sa wala mailhing kawatan ang beauty salon sa Tabunok, Dakbayan sa Talisay kagahapon sa kadlawon.

Si Jovelyn Paanting, manikurista, nitug-an nga sa iyang pag-abot sa lugar iya nang nabantayan nga guba na ang ilang roll-up door hinungdan sa iyang pagtawag sa ilang labaw.

Nakuha sa kawatan ang cellphone nga kantidad og P1,500 apan pakyas sila sa pagkuha sa kita sa maong salon sulod sa duha ka adlaw tungod kay maayo kini pagkatago sa ilang kahera nga si Annie Schwartz.

Ang guwardiya sa building ang wala sab nakabantay sa kasikas tungod kay nisaka kini sa ikaduhang andana ug nag-uwan sab niadtong higayona. (BANAT NEWS)