Tubig sa MCWD magnihit kutob 2018

CEBU, Philippines - Suplay sa tubig sa Metropolitan Cebu Water District (MCWD) nagnihit karong tuiga ug gipaabot nga maabtan pa kini hangtud sa tuig 2018 una pa gyud matubag ang kakuwang sa supply sa pipila ka areas sa Metro Cebu.

Sa pagtak-op sa buwan sa Hulyo, nadugangan ang lista sa mga lugar nga gideklara nga nagkuwang ang supply sa tubig. Kini aron makapangandam ang mga konsumidor sa maong mga lugar matag adlaw.

Dugang niini, gisuspenso pud sa MCWD ang pagpanawat og bag-o nga mga aplikante sa service connections sa mga lugar nga nagkuwang nang daan ang supply sa tubig aron dili maapektuhan ang service hours sa mga existing customers.

Sugod sa Hulyo 2017, niabot na sa 35 barangays sa service area sa MCWD ang dili na 24-hours nga adunay agas sa tubig apan padayon nga giserbisyohan sa MCWD pinaagi sa supply management.

Si MCWD acting general manager Noel Dalena mipasalig nga bisan pa niini, kaning mga apektadong lugar dili mahitabong walay agas sud sa 24 oras.

Matud pa ni Dalena, nakakuha sila og supply nga 3 mil cubic meters kada adlaw gikan sa Cebu Manila Water Development gikan sa Carmen.

Karong tuig 2018 gipaabot nga makasugod na og supply og tubig ang Danao City nga nagtukod karon sa ilang bulk water supply project aron mo-supply og 20 mil cubic meters kada adlaw.

 Gitug-an ni Dalena, kasagaran sa nagkuwang og supply sa tubig mao ang mga sakaon nga bahin ug mga dapit nga naa sa kinatumyan sa distribution network sa MCWD.

Gipasabot ni Dalena nga apektado ang supply sa maong mga lugar labi na sa peak hours o sa oras nga taas ang demand sa tubig. Sa record sa MCWD, magsugod ni sa 6 a.m. hangtud sa 9 p.m.

Giawhag niya ang mga apektado nga konsumidor sa pagsawod og tubig o sa pagpa-instalar og tanke o cisterns aron duna sila’y magamit nga tubig sa peak hours.

Sa Mayo 2017, 33 ka barangays ang kuwang og supply sa tubig ug karon  ang pipila ka bahin sa Barangay Looc ug Umapad sa Mandaue City. (BANAT NEWS)