Smoking ban ipatuman sa Sugbo
CEBU, Philippines - Andam mopatuman sa Smoking ban ang mga kadagkoan sa Sugbo, apan adunay kabalaka nga makaapektar kini sa turismo ug ekonomiya.
Si Gob. Hilario Davide, III kinsa miangkong manigarilyo miingon nga wala siya’y problema niini karon nga gipirmahan na ni Presidente Rodrigo Duterte ang executive order bahin niini.
Nagtoo ang gobernador nga wala kini magpasabot nga hingpit na gyud ang pagbawal sa sigarilyo kay adunay mga lugar nga “designated smoking areas.”
Apan ang hepe sa Provincial Health Office (PHO) Dr. Rene Catan nagkanayon mosugyot sila sa hunta probinsiyal nga mopalabang og ordinansa aron makagama sila og programa sa kamanduan sa presidente.
Matud ni Catan nga ang panigarilyo moresulta kini og dili maayo ngadto sa panglawas sama sa hypertension, sakit sa kasing-kasing, pneumonia, pulmonia ug cancer.
Samtang makasakit usab ang “second hand smoke” ngadto sa mga dili manigarilyo nga makahanggab niini ug mas grabe pa.
Gipasabot ni Catan nga ang pagpanabako maka-adik kay ang nicotine duna kini kemikal nga makaapekto sa utok.
Base sa report sa National Cancer Institute ang secondhand smoke nagdala kini sa sobra sa 7,000 ka kemikal diin 250 niini makadaot sa panglawas sama sa hydrogen, cyanide, carbon monoxide, formaline, ammonia ug uban pa nga pulos maka-kanser. (BANAT NEWS)
- Latest
