Duha ka pulis sa Sugbo abogado na

CEBU, Philippines - Duha ka pulis nakapasar sa bag-ohay lang gipagawas kagahapon nga resulta sa Nobiyembre 2016 Bar examinations.

Usa sa mga bag-ong abogado mao si Chief Inspector Maria Theresa Macatangay, Deputy chief sa Investigation and Detective Management Branch (IDMB) nga gradwado sa Law School niadto lang 2016 sa University of San Jose-Recoletos.

Matud niya nga dili lalim ang magskwela og abogasya samtang nagtrabaho pagkapulis kay matud niya lisod dunganon ang pagtuon ug ang pagpangronda sa mga kriminal.

“We conducted raids. In the morning I do office works, in the evening I attend classes after classes I do raids because I want to get medals,” matud ni Macatangay. Iyang gibutyag nga ganahan siyang makamedalya di para dekorasyon sa uniporme kondili aron maka-leave ug makatuon.

Ang Medalya ng Papuri adunay pahalipay nga tulo ka adlaw nga leave, samtang ang Medalya ng Kasanayan, upat ka adlaw ug lima ka adlaw kun Medalya ng Kagalingan.  Pag-abot og 4th year ni Macatangay, miundang pagkuyog sa mga raids aron magtuon.

Gipaabot ni Macatangay ang resulta diha sa simbahan sa Divine Mercy kay gusto niya og mingaw nga dapit ug aduna siyay oras para sa iyang kaugalingon kun ugaling siya mahagbong.

Gitug-an ni Macatangay nga giampo gyud pud niya nga mo-top sa maong exam gani, iya kining gisuwat didto sa Archbishop Palace.

Karun nga abogado na siya, gusto ni Macatangay nga mobawos sa organisasyon sa kapulisan nga niabli kaniya og mga oportunidad para makab-ot ang iyang gitawag nga ‘life’s dream.’

 “Baka gagawin ko siyang station commander para magamit din niya. Although iyung position niya ngayon, deputy siya ng investigation ay magagamit din naman niya in filing of cases. At least ang Cebu City ay mayroon ng lawyer,” matud pang Cebu City Police Office director Joel Doria.

Ang ikaduhang nakapasar mao si Police Chief Inspector Gerard Pelare, hepe sa kapulisan sa siyudad sa Danao. Sama ni Macatangay si Pelare miangkon nga dili lalim dunganon ang duha ka mga bug-at nga mga responsibilidad, ang pagkapolis ug pagtuon og abogasya.

 “Thankful sa blessing nga nadawat and nag-anticipate ta sa dakong challenge that comes with passing the bar,” matud ni Pelare sa pakighinabi kaniya sa Banat News.

Gihulagway ni Talisay City Mayor Eduardo Gullas nga makapahigmata sa mga tunghaan sa kaulohan ang nigawas nga resulta sa Bar exams sa niaging tuig  human walay bisan usa ka tunghaan didto sa kaulohan nga nalakip sa top 10.

Tungod niini, nagtuo si Gullas nga mosaka sab unya ang mga magpa-enroll nga tinun-an sa Siyudad sa Sugbo nga mokuha og abogasya ug di na karon makapasulabi ang mga dagkong tunghaan sa kaulohan sa ilang garbo nga kanunay lang nga maapil sa top 10 sa mga nangaging mga pasulit. Camille Pateres ug Gabriel Bonjoc (BANAT NEWS)