Isdang pinabuthan gisakmit

CEBU, Philippines - Mokabat sa 70 ka kilo sa klase-klase nga isda balor og P10,000 nga giingong pinabuthan ang nasakmit sa Cebu Provincial Anti-Illegal Fishing Task Force (CPAIFTF) niadtong Martes sa gabii sa Guianon, Estaca, Compostela. Ang hepe sa CPAIFTF, Lyndon Ruiz, nibutyag nga nagpahigayon sila og market denial operation batok dihang ilang gipara ang usa ka Isuzu truck nga nagkarga og 119 ka kahon sa isda.

Gisusi sa fish examiner ug nasuta nga usa ka kahon nga 50 kilos ug laing 20 ka kilos nga gisagol sa ubang kahon ang pinabuthan.

Ang sakyanan gimaneho ni Demetrio Tipay, taga Hagnaya, San Remigio, ug gipanag-iya ni Donna Pescante.

Ang mga isda gikan sa Isla sa Bantayan ug ibiyahe unta paingon sa Pasil Fish Port sa Dakbayan sa Sugbo.

Hinoon ang mga isda nga dili pinabuthan ang wala nila apila sa pagsakmit.

Ang CPAIFTF gikatakdang mopasaka og kaso sa kalapasan sa Provincial Ordinance 2012-05 ngadto sa Fisheries and Aquatic Resources Adjudication Board batok sa tag-iya sa truck. Brenda D. Batuto ug Mary Cris Remata (BANAT NEWS)