Bukiran sa Talisay may tubig pa

CEBU, Philippines – Bisan sa kainit sa panahon nga nasinati wala pa nangayo og ayuda sa tubig ang mga bukirang barangay sa Siyudad sa Talisay.

Dili sama sa niaging tuig nga halos matag adlaw mahutdan og tubig ang Barangay Maghaway, Tapul, Manipis ug Campo 4. Si Kapitan Emmie Cabiluna sa Barangay Manipis niingon nga wala pay problema sa ilang lugar ang tubig.

Siya nagkanayon nga lahi  karong tuiga tungod kay aduna pa may pag-uwan nga ilang nasinati sa ilang lugar hinungdan nga aduna pay magamit nga tubig.

Matud niya nga lahi ang sa niaging katuigan tungod kay kaniadto nagsige lang sila og salig sa tubig nga ipadala sa kagamhanan.

Si Alvin Santillana, pangulo sa City Disaster Risk Reduction and Management Office (CDRRMO), niingon nga andam sila nga mopadala og tubig para sa mga molupyo sa bukirang barangay kun aduna gyu’y panginahanglan. (Gabriel C. Bonjoc/GMR)

Taiwanese gikuotan sud sa kan-anan

Gikuotan sulod sa kan-anan ang usa ka Taiwanese sa Salinas Drive, Lahug, Siyudad sa Sugbo.

Nakuha sa tulo ka wala mailhing kawatan ang kwarta nga P30,000, credit cards, passport ug ang sling bag sa langyaw nga balor og P7,000.

Sa inisyal nga imbestigasyon, nakita sa close circuit television (CCTV) footage sa maong kan-anan ang tulo ka tawo nga nilingkod tapad sa lamesang gikan-an sa langyaw ug gikuha ang bag niini. -/GMR (BANAT NEWS)