LWYD himoon karong Abril 6 hangtod 9
CEBU, Philippines - Dul-an sa 2,500 ka mga batan-on gikan sa Archdiocese of Cebu ug silingan nga mga diocese ang gipaabot nga moapil sa ika-31 nga Local World Youth Day ug Vocation Jamboree nga ipahigayon karong Abril 6 hangtud 9 nga ipahigayon dinhi sa Dakbayan sa Sugbo.
Ang LWYD karong tuiga adunay tema nga “Go Forth, Build Communities” ug matud ni Fr. Mark Barneso, ang chairman sa Commission on Youth, nga makasaysayanon karon ang LWYD kay giusa sa Vocation Jamboree.
Si Fr. Justin Lee, CSJ, Spiritual Director sa Family of United and Empowered Leaders (FUEL) ug over-all coordinator sa 31st LWYD miingon nga andam na sila sa maong kalihukan ug nakig-alayon na sa nagkadaiyang ahensya alang sa seguridad sa mga kabatan-onan. Sa unang adlaw, ipahigayon ang kalihukan sa San Carlos Seminary. Adunay ipahigayon nga pilgrim walk gikan sa San Pedro Calungsod Chapel sa may South Road Properties paingon sa University of San Jose-Recoletos Basak Campus. Usa sa mga highlight unya sa LWYD mao ang pakig-dayalogo ni Arsobispo Jose Palma ngadto sa mga batan-on.
Gipadayag ni Fr. Lee nga dili mominos P1.5 milyones ang ilang budget sa kalihukan ug bukas gihapon sila sa buot mosuporta niini. (BANAT NEWS)
- Latest