Drug free brgy sa Talisay lisud tuohan
CEBU, Philippines - Naglisud sa pagtuo ang pangulo sa Association of Barangay Council sa Dakbayan sa Talisay, Raul Cabañero, sa pamahayag sa ilang hepe sa kapolisan nga hapit na ma-drug free ang duha nila ka barangay.
Matud ni Cabañero nga salikwaot tuohan ang maong pamahayag tungod kay ang mga barangay nga gihisgutan duol ra kaayo sa Lagtang nga maoy iyang tan-aw nga ikaupat nga gihugupan og ilegal nga drugas.
Si Supt. Emerson Dante nipahibawo nga ang Tapul ug Campo 4 ang hapit na mahimong drug free ug mga papeles na lang ang ilang kuwang.
Si Cabañero niingon nga kung sa mga dokumento mahimo sila nga maka-comply apan lisud para kaniya nga motuo nga wala na gyu’y drugas sa duha ka barangay.
“Bisitahi gani ang lugar tan-awn nato og wala ba’y mga tawo nga managan inig abot sa mga polis,” nagkanayon si Cabañero.
Sigon pa ni Cabañero nga ang problema sa drugas problema gyud sa tanan. Gani sa iyang obserbasyon kasagaran gyud sa katawhan ang biktima sa ginadiling drugas.
Iyang gibutyag nga nag-una nga gihugupan gyud og drugas sa Talisay mao ang Barangay Tanke, sunod ang iyang barangay sa Bulacao dayon San Isidro ug ang ikaupat mao ang Lagtang.
Alang kaniya dili na angay modeklarar og drug free ang usa ka lugar ug ang himuon mao gyud ang padayon nga paggukod sa ginadiling drugas. - /GMR) (BANAT NEWS)
- Latest
