Sibonga ex-mayor pakasuhan sa Ombuds

CEBU, Philippines - Ang Ombudsman mimando sa pagpasaka og kaso batok sa kanhi mayor ug karon konsehal sa Lungsod sa Sibonga nga si Lionel Bacaltos tungod sa giingong kalapasan niini sa Section 3(e) sa Anti-Graft and Corrupt Practices Act.

 Giingong ilegal ang pagdawat og honorarium ni Bacaltos gikan sa Philippine Health Insurance Corporation (PhilHealth). Base sa resolusyon sa Ombudsman, niadtong tuig 2012 ang PhilHealth mi-sponsor og health care program diin naghatag kini og honoraria ngadto sa municipal health office personnel nga mikabat sa P280,197.00.

Niadtong Pebrero 2015, giingong si Bacaltos miapil sa iyang kaugalingon sa listahan sa mga makadawat og honorarium bisan og dili siya sakop sa municipal health office.

Sa pagresolba sa kaso, ang Ombudsman nagkanayon nga si Bacaltos dili makapangangkon nga kabahin siya sa non-health professional staff sa health facility kay wala siya maghatag og health services. Giingong si Bacaltos nakahimo og kalapasan tungod sa pagdawat niya og honorarium nga mikantidad tanan ngadto sa P17,512.50 bisan dili siya apil niini.

Ubos sa Section 3(e) sa R.A 3019, gidili ngadto sa public officials nga mogamit sa iyang gahum aron makakuha o mohatag og pabor sa pribado o habig sa gobiyerno. (BANAT NEWS)