Ting-init magsugod na; mcwd mipasalig magdugang og tubig
CEBU, Philippines - Isip pangandam sa panahon sa ting-init ug sa nagpadayong pagsaka sa konsumo sa Metro Cebu, ang Metropolitan Cebu Water District (MCWD) modugang og 5,000 cubic meters per day nga suplay sa tubig sunod buwan.
Gipahibawo ni Charmaine Rodriguez-Kara, ang tigpamaba sa MCWD nga gawas niini aduna pay 3,000 cubic meters sa tubig matag adlaw ug ingon man dugang nga 2,000 cubic meters matag adlaw ang mosulod sa ilang pipelines karong tuiga.
“Kay nagkaanam gyud og kadaghan ang kunsumidor sa tubig sa Metro Cebu,” matud pa ni Kara.
Ang MCWD karon adunay kulang nga 40,000 cubic meter nga suplay sa tubig matag adlaw.
Si Kara nidugang nga sa padayon nilang paninguha aron madungagan ang ilang tinubdan sa tubig, ila unang gisuspenso ang pagbutang og mga bag-ong water connections sa 27 ka mga lugar sa Metro Cebu.
Giawhag usab sa MCWD ang publiko nga motaho sa ilang buhatan kun makakita og leaks sa ilang mga tubo aron dili mausik ang tubig ug ingon man magtigom og tubig aron dili mahutdan ug sa dili pag usik-usik niini. Samtang si Alfredo Quiblat Jr., ang PAGASA-Mactan chief sa iyang bahin nagkanayon nga mosulod na ang panahon sa ting-init sunod semana o sa unang semana sa Abril hangtud na sa Mayo.
Apan matud niini, ang temperatura gibana-bana lang sa 26 ngadto sa 34 degrees celcius ug dili na kini molapas sa 35 degrees celcius sama sa miaging tuig.
Matud pa ni Quiblat nga makasinati ang Sugbo og 6 ngadto sa 9 ka bagyo sugod karong buwana hangtud sa Agosto. Mitchellle L. Palaubsanon ug Rowena D. Capistrano (BANAT NEWS)
- Latest
