EDITORYAL - Kamatuoran man kaha ang gipangita?

Unsa kaha ang padulngan niining pagtumaw sa retiradong polis nga si SPO3 Arturo Lascañas, ang gitumbok nga team leader sa Davao Death Squad kaniadto ni Edgar Matobato nga miangkon nga usa sa mga hitman sa maong grupo?

Wala pa gani masugdi ang subli nga pagtuki sa maong isyu, daghan na ang mibato og mga akusasyon kang Lascañas kay dili na kuno siya credible, kay bakakon. Sa unang inquiry kun aduna ba gyuy “state-sponsored extra-judicial killings” natuki ang bahin sa DDS sa Davao City.

Tuig 2009 pa nga ang kanhi tsirman sa Commission on Human Rights (CHR) ug karon Senador Leila de Lima nga nag-imbestigar bahin sa DDS. Si Matobato miwadwad kutob sa iyang nahinumduman sa partisipasyon niya sa DDS, apan usa si Lascañas, kauban ang kampo ni Duterte ug ang Malacañang nga nihimakak nga adunay DDS.

Daghang mga buslot, kuwang og mga testimoniya ug ebidensiya mao nga wala tuohi si Matobato, ug karon siya pa ang nakiha. Si Matobato giyaga-yagaan kay wala siya’y grado. Apan karon, aniay retiradong polis sa pagkatawo ni Lascañas nga daghan og ikatubag ug posible nga maoy mokompleto sa mga kuwang nga pamahayag ni Matobato.

Sama ni Matobato “nakonsensiya” na usab kuno siya. Pareho  nga may pamilya, apan kun buot hunahunaon, mas hayag pa unta og kaugmaon si Lascañas kun itandi kang Matobato kay retirado kining polis ug ang presidente dugay niya nga naserbisyohan sa Davao City.

Apan ngano man kaha nga iya man nga isugal kining tanan kun bakak lang diay ang iyang ipamahayag? Unsa may iyang makuha nga molabaw pa sa bili sa iyang pamilya? Kahibalo si Lascañas nga mapriso gyud siya tungod sa pagpamakak  ug dudahan gyud ang iyang mga pamahayag nga mosukwahi sa una niyang testimonya kay makuwestiyon na ang iyang kredibilidad.

 Apan kun si Matobato nga wa’y grado gipaminaw man gani ug gidawat ang unang pamahayag ni Lascañas kaniadto, ngano nga dili man kini paminawon karon? Kamatuoran man kaha ang gipangita?