Orcullo, Dumpit, DILG official wa kasulod barangay hall sa Ermita

CEBU, Philippines -  Gibisita sa tinudlo ni Mayor Tomas Osmeña Atty. Winifredo Orcullo ang Barangay Ermita kagahapon uban sa mga representante sa Department of Interior and Local Government (DILG) Cebu City ug si Senior Police Officer 1 Adonis Dumpit isip Brgy police.

Apan wala’y nahitabo sa ilang pag-adto tungod kay ang pultahan paingon sa ikaduhang andana diin ang buhatan sa barangay ang gi-padlock.

Nangutana si DILG Cebu City Director Joy Calvo nganong gisirad-an kini ug kinsay nagkupot sa yawe aron ablihan ang barangay.

Matud sa Brgy Secretary Erwin Peñafort nga natunong lang ang iyang mga kaubanan mitambong og hearing ug walay makabantay mao nga gisirad-an kini ug ang naghupot sa yawe nikuyog sa pagtambong sa hearing. Nasayran nga gipakuha na unta ang yawe apan ang DILG lakip na si Atty. Orcullo wala na mihuwat nga mabuksan ang barangay hall.Matud sa tinugyanan sa DILG Cebu City Joy Calvo gipahibawo nila ang ilang Regional Director nga si Atty. Rene Burdeos mahitungod sa pagsira sa barangay hall ug gimandoan sila nga himoan og report ang maong insidente.

Si Acting Mayor Edgar Labella miapas sa Ermita ug sa iyang pag-abot abli na ang barangay hall ug didto iyang gitawgan si Calvo nga abli na ang buhatan. (BANAT NEWS)