Kapolisan naalarma sa ATM skimming

CEBU, Philippines - Usa ka joint operation ang plano karon nga himoon sa kapulisan kauban ang mga security officers sa mga nagkadaiyang bangko aron madakpan ang mga grupo sa mga gidudahang sindikato nga namiktima gamit ang ATM cards.

Si Chief Supt. Noli Taliño ang director sa Police Regional Office-7 mimando sa director sa kapulisan sa Dakbayan sa Sugbo, Sr. Supt. Joel Doria nga makig-alayon sa mga security officers sa mga bangko aron mahisgutan ang maong problema.

Gitug-an ni Taliño nga usa ka security officer sa bangko nga kaila niya ang mitawag ug mipahibalo kabahin sa maong problema.

Wala na hinoon gidetalye pa ni Taliño kung unsa nga paagi nila pagsumpo ang maong grupo apan kini miingon nga kinahanglan gayod nga maundang ug masikop ang mga responsabli.

Apan iyang giawhag ang publiko ilabina sa mga mag-withdraw og mga kuwarta sa mga Automatic Teller Machine (ATM) nga magbantay kanunay aron dili mabiktima sa mga “skimming devices” nga gipapilit sa mga ATMs .

Ang skimming device mokopya sa mga impormasyon sa mga ATM cards ug pinaagi  sa impormasyon apil ang password o pin number ug account number makahimo na sila og laing ATM card nga ilang gamiton pag-withdraw.

Sumala pa ni Taliño nga sa dili pa mobutang sa mga cards sa ATM machines subayon una ang mga machines kung walay talagsaong butang nga gipilit duol sa card slot o paslakanan sa card ug magbantay usab sa  mga tawo sa palibot.

Adto lang sa hayag ug may gwardiya nga ATM booths magtransaksyon.

Si Taliño mibahad nga bisan og kini usa pa ka langyaw andam ang kapulisan nga mosikop sa maong grupo.

Usa sa nahimong biktima niini mao si Konsehal Dave Tumulak ug duna usa’y mga nabiktima sa Dakbayan sa Naga. (BANAT NEWS)