2 patay sa buy-bust operations

CEBU, Philippines - Duha ka mga gidudahang drug personalities ang napatay sa managlahing anti- illegal drugs operation sa kapulisan sa Dakbayan sa Naga ug lungsod sa Cordova niadtong nakalabay nga gabii ug kagahapon sa kaadlawon.

Sa Dakbayan sa Naga, patay ang usa ka sinaligan sa usa ka notadong drug pusher human kini nakigpinusilay sa mga sakop sa Naga City Police ug Regional Intelligence Unit-7 atol sa buy-bust operation diha sa Brgy. Langtad alas 12:30 sa nakalabay nga kaadlawon.

Patay atol sa pinusilay si Michael Baraquel, samtang nakasibat ang target sa mga polis nga si Rene Sayaboc, alyas Rabat.

Ang desk officer sa Naga City Police nga si Police Officer 2 Ken Cabrera miingon nga atol sa gihimo nga operasyon unang namusil sa mga polis si Baraquel  ug nakahigayon pagsibat si Sayaboc. Sulay pa unta nga gidala sa Minglanilla District Hospital apan nakabsan gayod kini sa gininhawa.

Narekober sa mga polis sa lugar ang usa ka shotgun, usa ka Colt AR-15 Rifle, mga bala sa .45 caliber pistol ug shotgun, nakuha usab ang usa ka medium size pack sa gituohang shabu ug mga drug paraphernalia.

Samtang sa lungsod sa Cordova, patay sab sa buy-bust operation ang usa sa mga “High Value Target” sa Cordova Police Station human gikatahong misukol sa mga polis diha sa Brgy. Gabi pasado alas 7 sa nakalabay nga gabii.

Giila ang suspetsado nga si Alfie Lopez, nagpuyo sa maong dapit.

Matud pa gipalitan og P300 nga shabu ang suspek apan nakabantay kini nga polis iyang kasabot ug diretsong mibunot kini sa iyang dala nga revolver hangtod kini napusilan sa polis.

Gidala pa unta paingon sa Vicente Sotto Memorial Medical Center (VSMMC) ang suspetsado apan gideklara kini nga dead on arrival.

Narekober sa mga polis gikan sa suspetsado ang usa ka Snubnose .38 revolver, usa ka medium size pack ug usa ka gamay nga pakete nga dunay sud nga gituohang shabu.

Nadakpan usab sa mga sakop sa Waterfront Police Station ang usa ka 18-anyos nga estudiyante sa kolehiyo human kini nadakpan sa mga polis ug nakuhaan og dakung bulto sa gituohang shabu atol sa buy-bust operation diha sa Villagonzalo 2, Brgy. Tejero ning Dakbayan sa Sugbo niadtong nakalabay nga gabii. Ang suspetsado giila nga si Christian Mari Tiu, nagtungha sa usa sa mga unibersidad dinhi sa dakbayan sa Sugbo sa kurso nga Marine Engineering.

Ang hepe sa Waterfront Police nga nahinabi sa Banat News, Chief Insp. Bienvenido Miral miingon nga hugot nga milimod ang suspetsado sa pasangil bisan og kini nadakpan na sa mga operatiba.

Nakuha sa kapulisan gikan sa suspetsado atol sa buy-bust operation ang usa ka dakung putos sa gituohang shabu nga gibanabana nga anaa sa halos P100 mil ang kantidad.

Samtang ang mga sakop sa Provincial Intelligence Branch (PIB) sa Cebu Provincial Police Office misikop sab sa usa ka notadong drug suspek sa Dakbayan sa Carcar nga si Hermes Navarra, alyas Messing nga maoy target sa kapulisan ug ang kauban niini nga si Richard Regis, alyas Etsing.

Gamit ang P300 nga buy-bust money nadakpan sa mga sakop sa PIB ang duha human kini nakatunol og gituohang shabu ug nakuhaan og dugang 21 gramos nga shabu nga nagkantidad og P247, 800.

Sa laing operasyon, nasikop sa kapulisan sa Toledo City Police Station ang duha ka babaye ug usa ka lalaki sa gipahigayong buy-bust operation sa Brgy. Don Andres Soriano (Lotupan) sa maong dakbayan. Ang subject sa operasyon mao si Wilma Cabiles, samtang nadakpan iyang mga kauban nga sila si Mirasol Serad ug Jonathan Emiano pulos taga Brgy. Lotupan human giingong naatlan nga nagsuyop og ginadiling drugas.

Nakuha gikan kang Cabiles ang gagmay nga pakete sa shabu, duha ka medium size nga pakete sa shabu ug ang P200 nga marked money.

Samtang ang laing duha ka dinakpan nakuhaan og gagmay nga pakete sa shabu ug drug sniffing paraphernalia. Jojo Ugdol, Romeo Limpangog ug Raymond Abarcas (BANAT NEWS)