Way dalang franchise pamultahon
CEBU, Philippines - Giisyuhan og citation ticket ang duha ka bus driver nga wala nagdala sa ilang prangkisa atol sa inspeksiyon sa taga Land Transportation Franchising and Regulatory Board sa Cebu South Bus Terminal.
Matud ni Emil Membrillas, assistance information officer sa LTFRB-7, nga nipahigayon sila og inspeksyon sa mga bus sa terminal kauban sa regional director nga si Ahmed Cuizon isip kabahin sa pagpangandam sa kalag-kalag.
Sumala pa ni Membrillas nga atol sa ilang pagsubay sa mga terminal ila usab gipahimutang ang mga tarpaulin ug complaint desk alang sa Oplan Ligtas Biyahe Undas 2016.
Gitug-an ni Membrillas nga duna silay nasita ug naisyuhan nga duha ka bus driver human napakyas pagpresentar sa ilang mga prangkisa kay nabiyaan, rason nga makahimo kanila sa pagmulta og P2,000.
Giawhag ni Membrillas ang tanang drivers nga magdala kanunay sa ilang mga official receipts (OR), certificate of registration (CR), franchise ug uban pa nga mahimo nilang ma-presentar sa inspection team.
Gitug-an usab ni Membrillas nga nagpadayon na sila karon sa pagpanawat sa gustong mokuha og special permit alang sa mga mobiyahe gawas sa ilang rota aron dili sila mahimong kolorum.
Dad-on sa mga magparehistro ang ilang OR, CR, franchise ug hulagway sa tag-iya sa sakyanan nga kuhaan og special permit.
Dugang ni Membrillas nga hugot nga seguridad ang ilang ipatuman sa kadalanan sugod karong adlawa ilabi na nga taas ang bakasyon ug napanglantawan nila nga daghan gyud ang mouli sa probinsya. (BANAT NEWS)
- Latest
