Na-missing patay na

CEBU, Philippines - Patay nang nakit-an ang lalaki nga una nang gikatahong na-missing human ang ilang gisakyang pumpboat nabanggaan og usa ka barko diha sa kadagatan sa Brgy. Tayud, Consolacion niadtong miaging kaadlawon.

Napalgang naglutaw sa kadagatan sa Golden Dragon Wharf sa Brgy. Labogon, Dakbayan sa Mandaue  ang lawas ni Laurence Aroa,40, nga taga Tugbongan, Consolacion.

Si Aroa na-missing human kini niambak gikan sa pumpboat dihang nabanggaan sila sa LCT Aleesa. Kauban ni Aroa niadtong tungora ang tag-iya sa pumpboat nga si Roberto Vercede kinsa luwas nga nahaw-as sa mga tripulante sa LCT Aleesa. Si Police Officer 1 Glenn Bordalba sa Presinto 3 sa Mandaue City Police Office (MCPO) miingon nga may mitawag sa ilang buhatan ug mipahibalo kalabot sa naglutaw nga patay’ng tawo diha sa nahisgutang lugar. Matud pa ni PO1 Bordalba ang mga kabanay ni Aroa maoy positibong miila sa patay’ng lawas.

Ang mga sakop sa Philippine Coast Guard-Mandaue mipahigayon og search and rescue operation diha sa maong lugar apan wala nila makita si Aroa kinsa giingong wala na motunga gikan sa dagat human kini niambak.

Dugang pa ni Bordalba nga sa paghiling nila sa lawas ni Aroa nakaangkon kini og grabeng kadaot sa lawas nga gituohang naigo sa usa ka bahin sa barko atol sa pagbangga. (BANAT NEWS)