Terminal nangandam sa tingklase
CEBU, Philippines - Nunot sa pagbukas sa klase karong Lunes, subsob ang gihimong pagpangandam sa Cebu South Bus Terminal aron maseguro nga luwas ang mga pasahero nga mangabot sa dakbayan.
Nagkanayon si Ramon Dumayac, operations manager sa CSBT, nga ang nag-unang pagpangandam nga ilang gihimo mao ang paghatag og seguridad sa mga pasahero nga mangabot gikan sa kalungsuran.
Kini aron dili mabiktima sa mga badlungon sa katilingban nga mopahimulos sa higayon. Gawas sa walo ka polis gikan sa Cebu Provincial Police Office, dugang walo usab ka sakop sa Civil Security Unit sa Kapitolyo ang moabag sa pagpatunhay sa kahapsay ug kalinaw ug magpahigayon sila og roving matag adlaw.
Hinoon walay mga pasahero nga nabiktima sa krimen sulod sa terminal ug matud pa sagad mahitabo ang kawat ug pagpanguot sa gawas na.
Gilauman nga daghang pasahero nga mangabot karong adlawa ug ugma nga gibanabanang moabot sa 20 ngadto sa 30 mil ka pasahero tungod kay daghang tinun-an ang mamalik na sa siyudad kay magsugod na ang klase. Panawagan ni Dumayac sa mga pasahero nga dili mokompiyansa ug bantayan gyud ang mga gamit aron dili mabiktima sa mga dautang elemento. (BANAT NEWS)
- Latest