Election returns sa Sugbo gipadala na sa Manila

CEBU, Philippines - Di momenus upat ka libong election returns ang gibiyahe kagahapong adlawa padung sa kaulohan.

Matud ni Atty. Eliseo Labaria ang OIC sa provincial Comelec ang maong mga election returns gamiton aron ma- canvass sa National Board of Election Canvassers ang resulta sa eleksyon diri sa probinsya sa Sugbo.

Matud niya nga importante ang ERs sa pag-canvass sa NBOC gawas sa transmitted nga resulta.

Ala- 1 kagahapon sa hapon gibiyahe ang mga election returns gikan sa 51 ka LGUs diri sa lalawigan sa Sugbo pinaagi sa  Philippine Airlines kon PAL padulong sa kaulohan ug miabot sa alas-3 sa hapon.

Samtang ang mga vote counting machines matud ni Labaria anaa na karon sa warehouse sa 2Go aron nga ibiyahe padulong didto sa kaulohan. (Le Phyllis Antojado/EIM)

Taga Poblacion Talisay nanglimpyo

Usa ka semana human ang piniliay, nanglimpyo ang mga opisyales sa Brgy. Poblacion, Dakbayan sa Talisay sa ilang palibot gikan sa gipamilit nga campaign posters sa mga kandidato nga gipangpilit sa nagkadaiyang lugar.

Si Kapitan Teodoro "Balo" Belleza maoy mangulo sa pagpanglimpyo uban ang iyang mga konsehales lakip na ang mga barangay tanod, Barangay Health Workers (BHW), mga basurero ug uban pang mga trabahante sa barangay.

Tumong nila nga mabalik ang kalimpyo sa palibot tungod kay hapit na sab ang ting-uwan.

Matud pa ni Belleza nga ila unang gipalabay ang usa ka semana sa paghatag og panahon sa mga kandidato nga gustong sila mismo ang mohipos sa ilang mga campaign posters kay basin og ilahang e-recycle sa sunod nga piniliay. Si Belleza nidagan pagkakonsehal apan naparot.

Sumala pa niya, mapuslan pa ang mga campaign posters nga iyang gipanghipos tungod kay posible pa kining magamit kun tagaan sa higayun nga makalangsad pa sa sunod nga piniliay.

Siya nidugang nga ila sang iapil sa paglimpyo ang mga kanal nga nangauga tungod sa kainit sa panahon.

Asoy pa niya nga mas maayo nga limpyuhan daan ang mga kanal sa mga basura aron inig abot sa ting-uwan wala nay mga basura nga makabara sa mga kanal nga makaingon sa baha. (BANAT NEWS)