Dumpit adunay kabutangang unit
CEBU, Philippines - Adunay kabutangan nga police unit ang kontrobersyal nga polis nga si Senior Police Officer 1 Adonis Dumpit kung kini makabalik na sa serbisyo.
Matud ni Chief of Regional Personnel and Resource Development Division 7 Senior Superintendent Renato Dugan nga madestino si Dumpit sa Regional Personnel Holding Administrative Unit (RPHAU). Dugang pa ni Dugan nga ang RPHAU maoy holding area sa mga polis nga niagi og suspension order, mga kaso, nag-schooling, under investigation ug uban pa. Kini magdepende sa direktiba sa command group ug ni Regional Director Patrocinio Comendador kung asa ibutang si Dumpit.
Si Dumpit nadestino kaniadto sa Cebu City Police Office dihang si Comendador pa maoy City Police Director. Niadto sab higayona nahitabo ang pagkapusil patay sa gipasanginlang notadong tulisan nga si Ronron Go.
Una na giangkon ni Comendador nga dakong tabang sa pwersa sa kapolisan si Dumpit sa pakigbisog batok sa kriminal tungod sa kinaiya niini nga di magpanuko pakigharong sa mga notado ug ngilngig nga mga kriminal kaniadto dinhi sa dakbayan.
Ug ang mga kaparehas niya og abilidad sama sa ubang dugang mga polis dako og matampo sa kapolisan matud pang Comendador.
Si Comendador kinsa nahimong hepe sa Cebu City Police Office miangkon nga nakakita siya sa panerbisyo ni Dumpit.
Si Comendador maoy usa sa mga trainors ni Dumpit sa PNP-Scout ug kaniadto pa gikakitaan na niya og potensyal ang maong kontrobersyal karon nga polis. (BANAT NEWS)
- Latest
