Sakop sa sindikato sa drugas napatay

CEBU, Philippines - Patay ang usa ka sakop sa gituohang sindikato sa drugas sa dakbayan sa Lapu-Lapu human kini nakigpinusilay sa kapolisan nga modakop unta kaniya didto sa Barangay Agus kagahapon sa kaadlawon.

Ang napatay sa mga polis mao si Joel Amistad, 43, minyo ug taga Barangay Agus, dakbayan sa Lapu-Lapu.

Sumala pa ni Sr. Insp. Alcon Escosura, hepe sa Station 4 sa Lapu-Lapu City Police Office nga ila unta nga ipatuman ang warrant of arrest nga giisyu sa korte batok ni Amistad tungod sa kaso may kalambigitan sa drugas.

Nagkahugpong ang mga polis sa Lapu-Lapu ug Regional Intelligence Branch (RID-7) sa pagdakop unta nila kang Amistad. Matud ni Escosura nga dihang nakabantay si Amistad nga adunay mga polis sa iyang palibot mao nga migawas kini ug namusil.

Apan ang kapolisan nakapasalipod nang daan ug abtik nga mibawos pagpusil kang Amistad. Gidala sa kapolisan si Amistad ngadto sa Lapu-Lapu District Hospital, apan namatay kini pagka alas 4:10 sa kaadlawon.

Si Escosura miingon nga gihimo nila ang hiniusang operasyon isip follow-up sa pagpusil patay sa usa ka polis nga sakop sa intelligence unit sa Lapu-Lapu City Police Station 4 kaniadtong Sabado.

Si Chief Insp. Mark Sucalit, hepe sa Intelligence Branch sa dakbayan sa Lapu-Lapu, miingon wala sila mokumpiyansa kay nakadawat sila og report nga armado si Amistad nga sakop sa “Oyao Drug Group”.

Sigun pa ni Sucalit nga ilang giisip nga “armed and dangerous” ang mga sakop sa maong grupo.

Ang “Oyao Drug Group” nga sakop si Amistad gikataho nga mao’y mipatay ni PO3 Antonio Inihao Jr. didto samtang ang polis naniid didto sa usa ka tigbakayan sa Barangay Calawisan.

Matud sa mga polis nga ang “Oyao Drug Group” usa ka dakong grupo sa mga durugista nga naglihok sa maong siyudad nga taud-taod na nila nga gipanid-an.

Nadakpan sa kapolisan ang anak ni Amistad nga si Khien, 18, ug nakuhaan kini og 42 ka gagmay’ng pakete sa shabu. Nakaplagan sa mga polis ang 357 Magnum revolver nga gituohang iya sa napatay nga si Amistad.

Ang kapolisan padayong naghimo og imbestigasyon sa pagpatay ni PO3 Inihao.

May gamay na nga ideya ang kapolisan kun kinsa ang tawo nga mipatay sa polis ug gitigom pa lang nila ang dugang ebidensya pinaagi sa paghimo og dugang imbestigasyon. (BANAT NEWS)