‘Suspek’ sa ambush wa na sa gipuy-an

CEBU, Philippines - Duna na’y gisundan nga person of interest ang kapolisan sa Lungsod sa Liloan nga lagmit mao’y makatabang sa pagsulbad sa kaso sa pag-ambush patay sa magtiayon niadto’ng nakalabay nga gabii sa Landing, Catarman.

Kini ang gitug-an ni Senior Insp. Ramil Morpos, ang hepe sa kapolisan sa Liloan nga nahinabi sa Banat News. Sa inisyal nga pagsubay sa kapolisan sa gipuy-an sa tawo, wala na kini apan nagtuo ang hepe nga wala pa kini nakabiya sa Sugbo.

Gusto ni Morpos nga ma-estorya ang mao’ng tawo kay ang mao’ng pangalan nigawas human sa gihimo’ng pagsubay sa pagpamanhig ug giingong tulis.

Sa pagkakaron si Morpos nipasabot nga ila gipangita ang mao’ng tawo apan wala na kini nihatag pa og dugang detalye aron maseguro nga kini ila’ng masikop.

Gipatawag na usab sa kapolisan ang mga nakakita ug nagsilbi’ng testigo sa hitabo aron sila magamit sa pagpasaka unya sa kaso.

Patay atol sa pagpamanhig sila si Josephine Angelo ug Celedonio Angelo human girapido ang gisakyan nga multicab.

Patay diha-diha ang asawa samtang patay na usab nga naabot sa tambalanan sa Liloan ang bana.

Problema sa yuta ug tulis ang padayon nga gisundan nga motibo sa kapolisan sa hitabo.

Apan mas ila’ng gipalawman ang isyu sa bikil sa yuta human nasayran sa mga awtoridad nga adunay nakabangi ang magtiayon sa wala pa ang insidente. (BANAT NEWS)