6 kawani sa CH niangkong drug users

CEBU, Philippines - Niangkon ang unom ka kawani sa Cebu City Hall nga sila tiggamitan og shabu diha’ng gipaubos sa random drug test nga gipahigayon sa Cebu City Office on Substance Abuse Prevention (COSAP) nga gipangulohan ni Dr. Alice Utlang.

Matud ni Utlang nga 254 na ka kawani gikan sa lain-lain nga buhatan sa Cebu City Hall ang napaubos nila sa random drug test sugod sa buwan sa Enero karon tuiga hangtud kagahapon sa buntag.

Gibutyag ni Utlang nga lima ang niangkon nga tigamitan og shabu niadtong buwan sa Enero ug usa karong buwana.

Si Utlang nipahibawo nga sa unom nga tiggamitan og shabu, lima niini ang casual nga kawani ug usa ang regular.

Dugang ni Utlang nga giduso na niya sa Human Resource Management Office ang resulta sa drug test diin ang mao’ng buhatan na ang mohimo sa sunod nga lakang.  (BANAT NEWS)