Kawatan patay sa guwardiya, laing guwardiya patay pud

CEBU, Philippines - Patay ang usa ka lalaki nga gidudahang kawatan human napusilan sa security guard nga iyang gidunggab sulod sa dakong kompaniya sa Brgy. Don Andres Soriano sa Dakbayan sa Toledo.

Ang namatay mao si Ronello Sasan samtang ang nakapusil kaniya mao si Gally Tolete, 60, detachment area commander sa Carmen Copper Corporation sa maong dapit.

Matud ni Police Officer 3 Carlos Barluado, duty desk officer sa Toledo City Police Station nga ang kaliwat ni Sasan mao ang niila niini.

Sa imbestigasyon nila ni Senior Police Officer 2 Thule Tahadlangit ug mga kaubanan, nakabantay ang guwardiya nga adunay tawong nakasulod sa ilang area human nila nadiskubrehan nga nawad- an sila og copper wire nga moabot sa 26 metros.

Nagtuo ang guwardiya nga wala pa makapalayo ang suspek hinungdan nga gilibot niini ang dapit  diin bukiron ug daghang mga kahoy, ug pag-abot niini sa libon nga bahin kalit siyang gidunggab sa suspek  ug naigo siya sa iyang dughan ug tuo nga bukton.

Apan bisan paman niini, napusilan ni Tolete si Sasan hinungdan sa iyang kamatayon. Daling gidala sa Carmen Copper Corporation Hospital ang guwardiya. Nakuha gikan sa suspek ang gigamit nga plamingko ug bagpack nga gisudlan sa mga bronse nga wire ug uban pang mechanical ug electrical tools.

Samtang dead on the spot ang 25 anyos nga guwardiya nga si Alejandro Bayawa human  gipusil sa iyang ulo sa usa ka Regee Labajo,22, diha sa Sitio Mapahiubsanon, Brgy. Bulacao ning Dakbayan sa Sugbo kagahapon.Matud ni Senior Police Officer 1 Reynaldo Tagalog sa Pardo Police Station nga nahinabi sa Banat News   gipalit sa suspek ang away sa amigo niini ug sa biktima.Ang duha padayon karong gipangita.(Raymond Abarcas ug Jojo C.Ugdol/EIM)

Fastcraft naaberya, 109 pasahero ug crew luwas

Luwas ang 109 ka mga pasahero ug crew sa Ocean Jet 88 nga nakaabot sa Dakbayan sa Sugbo, human kini sila nakasugat og aberya sa tungatunga sa Isabel, Leyte ug Camotes Island kagahapon sa buntag.

Matud pa ni Ricardo Rosaldo Jr., ang kapitan sa barko nga alas-10:04 sila nakabiya sa Ormoc City apan pag alas-10:30 wala na nigana ang ilang timon.

Sumala pa ni Rosaldo, naayo kini sa ilang mga engineers ug alas-12 sa udto nakadagan sila pag-balik apan putol-putol ilang pag-abante hinungdan nga alas-3:43 na sila sa hapon naabot sa Dakbayan sa Sugbo. 

Si Rosaldo nag-andam na sa ilang marine protest nga iduso sa Marina-7 aron kini masusi.

Si Genaro "Genie" Lastimado, ang Operations Manager sa Ocean Jet 88  nagkanayon nipadala sila og tugboat apan tungod kay hinay-hinay ra man nakadagan ang maong barko gisundan na lang kini sa tugboat hangtud naabot sa pantalan.

Gibutyag ni Lastimado, luwas hinuon ang tanang pasahero nga ilang gihatagan og pagkaon apan ang uban wala na nikaon kay adunay mga dinalian nga giapas sa ilang biyahe.

Tungod sa nahitabo, di una mobiyahe ang Ocean Jet 88 hangtud dili masusi kini sa Marina-7.

Usa ka pasahero nga wala magpaila nipadayag nga bisan nalangay, nagpasalamat gihapon sila nga luwas silang nakaabot. (BANAT NEWS)