Nagmugna sa IEC hymn interpretation taga Naga
CEBU, Philippines – Gradwado sa pagka-magtutudlo nga lumad nga taga Tuyan, Dakbayan sa Naga ug batan-on sa Our Lady of Holy Rosary Parish ang nagmugna sa International Eucharistic Congress official hymn interpretation.
Matud pa ni Jehan Marie Francisco nga mapasalamaton siya sa iya’ng igsuon nga si Engr. John Jason Francisco tungod kay gihatagan siya og higayon nga makahimo sa mao’ng interpretation.
Sumala pa ni Francisco nga nabuhat niya ang steps sulod lang sa usa ka adlaw ug gipraktis kini nila kauban sa mga taga Tuyan Animators sulod sa tulo ngadto sa upat ka adlaw.
Gibutyag ni Francisco nga gidawat niya ang hagit tungod kay gusto niya’ng mapaambit ang iya’ng talento isip usa ka batan-on nga wala niya giisip nga usa diay ka daku’ng kalihukan ug gigamit kini sa tibuok kalibutan.
Isip SPED student kanhi, iya’ng gipahaum ang interpretation sa mga Persons with Disabilities sama sa amang ug bungol nga makasabot sa mensahe sa kanta.
Samtang 1,458 ka kaparian, kamadrehan, theologians, seminarians ug mga layko ang nitambong sa Theological Symposium nga gibuksan kagahapon hangtud sa Biyernes.
Matud ni Fr. Guillermo Gorre nga ang symposium mao’y una’ng hugna sa IEC diin gituki ang mga nagkadaiyang sessions nga naglangkub sa Christian Virtue of Hope ug ang may kalabutan sa Ebanghelyo ni Juan.
Gihangop ug gikalipay usab ni Archbishop Jose Palma ang pagbukas na sa una’ng hugna sa kalihukan sa IEC ug giawhag ang mga Sugbuanon ug katawhan nga moapil sa mga kalihukan sa IEC nga bukas sa publiko. – /GMR) (BANAT NEWS)
- Latest
