Pamilya sa gipatay nga OFW nagpatabang ni Davide

CEBU, Philippines - Ang kabanayan niadtong Overseas Filipino Worker (OFW) nga giingong gipatay sa iyang agawon didto sa Al Nasiriah, Riyadh, Saudi Arabia, nangayo og panabang kang Gobernador Hilario Davide, III nga tabangan sila nga mapadala dinhi ang patay’ng lawas sa biktima.

Ang gipatay nga OFW mao si Lotis Yu Camo-camo, 35-anyos, taga Barangay Mainggit, dakbayan sa Toledo. Nagtrabaho si Camo-camo isip domestic helper didto sa Riyadh.

Dunay tulo ka anak si Camo-camo ug ang iyang bana tua usab magtrabaho sa Riyadh. Ang kalisod maoy nagtukmod sa magtiayon nga manglangyaw aron mahatagan og maayong kaugmaon ang ilang mga anak.

Ang anak ni Camo-camo nga si Methuseal, 18-anyos ug 2nd year college na sa kursong Bachelor of Science in Information Technology (BSIT), nakahilak nga miasoy nga naghuwat sila sa pagpauli sa ilang inahan nga gikatakda nga moabot unta karong sunod buwan.

Kataposan nga nahinabi ni Methuseal ang iyang inahan kaniadtong Septiyembre ug gani gipangutana pa siya kun unsay gusto niya nga gift alang sa iyang debut kaniadtong Oktubre.

Matud ni Methuseal nga susama ra sila og barkada ang iyang inahan kay buotan kini kaayo ngadto kaniya. Naglaom si Methuseal nga katabangan unta sila ni Davide nga mapadala unta dinhi ang lawas sa iyang inahan aron mahatagan kini og pormal nga lubong.

Sigon sa inpormasyon nga ang lawas sa biktima adunay mga bun-og mao nga gituohan nga gituyo siya sa pagpatay. Ang inahan ni Camo-camo miingon nga gitug-anan sila sa iyang anak nga gimaltrato siya sa iyang agawon nga babaye diha nga gibalibaran niini nga lugwayan pa ang iyang kontrata pagtrabaho sa ilang panimalay.

Ang pamilya ni Camo-camo gidala ngadto sa Provincial Social Welfare and Development Office (PSWDO) aron maasikaso ang gikinahanglan nila nga tabang. (BANAT NEWS)