Medical teams nangandam alang sa Sinulog ug IEC 2016

CEBU, Philippines – Human sa Pasko ug Bag-ong Tuig laing kalihukan na usab ang gipangandaman sa Department of Health (DOH)-7 ug kini mao ang selebrasyon sa Sinulog ug sa 51st International Eucharistic Congress (IEC) diin dako sila og partisipasyon sa maong aktibidad.

Gipaabot nga karong Enero 4 mopatawag og meeting ang DOH-7 sa mga emergency medical teams nga naglangkob sa nagkalain-laing medical services sa nagkadaiyang agencies, non-government organization ug government organization.

Matud ni Dr. Expedito Medalla, sa dili pa ang Sinulog Grand Parade unang mahitabo ang Nobenaryo hinungdan nga ang Philippine Red Cross, Emergency Rescue Unit Foundation (ERUF) naka-standy unya sa Basilica del Sto. Niño inabagan sa tabang sa medical team sa DOH.

Dugang ni Dr. Medalla, atol unya sa procession, ipakatap usab nila ang ilang medical teams sa nagkadaiyang strategic areas nga maoy agian sa prosesyon.

Kaabag usab sa Cebu Medical Society ang DOH sa pagpatunhay sa seguridad ug kaluwasan sa publiko panahon sa Sinulog Grand Parade.

Human unya sa Sinulog kadtong mga medical team mao usab ang medical teams nga magbantay alang sa 51st IEC diin liboan gihapon ka mga tawo ang gipaabot nga motambong.

Gawas sa medical team dinhi sa Sugbo nangimbitar usab ang DOH ug dugang medical teams gikan pa sa nagkadaiyang rehiyon aron motabang sa pagbantay sa seguridad ug kaluwasan sa publiko.

Sila mao ang mga medical teams nga gibansay atol sa APEC Summit sa miaging tuig.  (BANAT NEWS)