RAFI nidonar og dugang lawak saringan
CEBU, Philippines – Ang mga estudyante sa San Remigio National High School dili na unya kini magklase sulod sa tents tungod sa bag-ong classrooms nga gihatag sa Ramon Aboitiz Foundation Inc. (RAFI) ug sa kagamhanan sa probinsiya ngadto kanila.
Mikabat ngadto sa P12-milyones ang kantidad sa tulo ka andana nga school buildings nga gilangkuban sa siyam ka classrooms. Si Gobernador Hilario Davide, III, Bise Gobernador Agnes Magpale ug Ernie Alix sa RAFI maoy nangulo sa ceremonial turnover niadtong Disyembre 15.
Ang prinsipal sa maong eskwelahan nga si Reynaldo Dela Rama ang pormal nga midawat sa maong classrooms.
Si Dela Rama mibutyag nga sa wala pa ang maong classroom lima ka section nga gilangkuban sa 250 ka estudyante anha magklase sa mga tent.
Sugod sa buwan sa Enero, 2016 ang tanang klase anha na ipahigayon sulod sa classrooms. Gikatakda nga 450 ka special science students ang moukupar sa bag-ong classrooms. Ang maong proyekto natukod kini ubos sa partnership tali sa Kapitolyo ug RAFI. Ang RAFI maoy migasto sa 65 porsiyento sa total cost sa proyekto samtang ang Kapitolyo mihatag og P5 milyones isip counterpart.
Ang bag-ong school building sa San Remegio lakip kini sa 10 ka school buildings alang sa mga estudyante sa high school nga gipatukod province-wide. Si Davide sa iyang mensahe nagkanayon nga ang kabataan kinahanglan nga isentro sa paghigugma, atensiyon ug paningkamot tungod kay sila maoy paglaom sa nasud. Ang edukasyon maoy usa sa key agenda sa administrasyon karon.
Si Davide ug Magpale mapasalamaton kaayo sa RAFI sa mga gihatag niining tabang. (BANAT NEWS)
- Latest
