Tripolante sa barko napalgan naglutaw patay

CEBU, Philippines - Patay na nga naglutaw nga napalgan ang usa ka tripolante sa cargo vessel nga nagpundo sa Pier 7 sa Subangdaku, Dakbayan sa Mandaue alas 6 pasado kagahapon sa buntag.

Si Police Officer 3 Dindo Montesclaros sa Presinto 2 sa Mandaue City Police Office (MCPO) niila sa namatay nga si Leo Jay Cayabyab, 22-anyos, lumad nga taga Pangasinan.

Matud ni Montesclaros nga gitug-an sa mga kauban sa namatay nga alas 11 sa gabii niadto’ng Domingo katapusan kini nga nakit-an nga nisaka og balik sa sulod sa ila’ng cargo vessel nga LCT Co Sedan.

Gikan kini nakig-inom kuyog sa ubang tripolante ug nagsusapinday.

Dugang ni Montesclaros nga ang security guard sa Pier area nga si Pablo Benerao mao’y nakasigpat sa naglutaw nga lawas sa tawo sa dagat.

Nagtuo ang kapolisan nga nagtuman sa sugo sa lawas ang namatay ug wala lang damha nga natagak sa dagat hinungdan nga nalumos.

Si Montesclaros niingon nga gipaubos sa autopsy ang patay’ng lawas sa tripolante alang sa pagsuta kun may foul play ba o wala ang kamatayon niini. (Romeo T.Limpangog/GMR)

Swedish, laing usa patay sa aksidente

Duha ang patay sa managlahi’ng disgrasya sa Probinsya sa Sugbo niadto’ng nakalabay nga adlaw.

Sa Lungsod sa Moalboal, patay ang usa ka Swedish nga mechanical engineer human napasok sa kongreto’ng koral ang iya’ng gisakyang motorsiklo sa provincial road sa Barangay Tuble pasado alas 6 sa nakalabay nga hapon.

Ang biktima naila nga si Lars Starner, 52, minyo, gikataho’ng tulo pa lang ka adlaw nga naabot sa lungsod ug kasamtangang nagpuyo sa Barangay Basdiot.

Matud ni Police Officer 3 Ramon Chinel, imbestigador sa Moalboal Police Station, nga nahinabi sa Banat News nga gikan nitambong sa usa ka party ang langyaw sa usa ka beach resort sa ila’ng lungsod kauban ang lain sab nga higala nga mga langyaw.

Diha’ng paingon na unta nga mopauli ug pag-abot sa mao’ng dapit kalit lang nawad-an og kontrol sa gimaneho nga motorsiklo nga Honda CRF 250 ug nisampak sa sementado’ng koral sa balay ni Sanday Tabutabu. Si Chinel niingon nga dunay gisuot nga helmet ang biktima apan alang sa biseklita hinungdan nga wala kaayo nakasagang sa nabunal nga ulo sa koral.

Ang mga tawo nga nakakita sa hitabo dali pa unta nga nitabang sa langyaw ug gidala sa Badian District Hospital apan gideklarar kini nga dead on arrival.

Samtang sa Lungsod sa Argao, patay ang usa ka babaye human nadasmagan sa usa ka multicab sa national highway sa Barangay Langtad pasado alas 2 sa nakalabay nga hapon.

Ang biktima mao si Julia Albiso, 57, minyo ug nagpuyo sa mao’ng dapit, samtang ang drayber sa multicab giila nga si Emily Pino, 43, taga Candabong, Barangay Binlod sa mao’ng lungsod.

Sumala pa ni Police Officer 3 Benjamin Gerosaga sa Argao Police Station nga gikan nanimba sa Poblacion si Pino kauban ang iya’ng pamilya.

Apan sa ila’ng pagpauli ug pag-abot sa nahitaboan, gikataho’ng kalit lang nitabok ang biktima hinungdan nga nipilit kini sa multicab.

Grabe’ng bun-og sa ulo ang naangkon ni Albiso kinsa gidala pa unta sa Isidro Kintanar Memorial Hospital apan nakabsan gyud sa kinabuhi. (BANAT NEWS)