Gas tanker nakaligis patay

CEBU, Philippines - Patay ang usa ka tawo nga nadasmagan sa naghaguros nga tanker nga nagkarga og gasolina sa dalan M.C. Briones, Maguikay, Dakbayan sa Mandaue alas 2 pasado sa niagi’ng kadlawon.

Si Senior Police Officer 4 Vicente Benabaye, chief investigator sa traffic division sa Mandaue City Police Office, niila sa biktima nga si Roberto Chavez Jr., 44, taga Danglag, Consolacion.

Matud ni Benabaye nga nilabang sa atbang sa karsada ang biktima ug ang Isuzu tanker sa gasolina nga nagdala sa plate number RTR 350 nga kusog nga nagdagan padulong sa Dakbayan sa Sugbo ang kalit lang nidasmag niini.

Tungod sa kusog nga impact sa pagdasmag, ang biktima nakasinati gyud og grabe’ng kadaut sa kalawasan hinungdan nga dali kini’ng gidala sa Mandaue City Hospital apan gideklarar kini’ng dead on arrival.

Dali hinuon nga nitahan sa Presinto 4 sa MCPO ang drayber ug kasamtangan kini karong gitanggong sulod sa detention cell samtang ang kapolisan nagpaabot sa tagtungod sa namatay ug sa operator sa tanker. (BANAT NEWS)