Tuloy, andohaw bawal una kuhaon–BFAR
Edwin Ian Melecio (Banat) - November 24, 2015 - 9:00am

CEBU, Philippines – Gipahibalo sa Bureau of Fisheries and Aquatic Resources-7 ang pagpatuman sa tulo ka buwang commercial fishing ban sa Visayan Sea nga nagdili pagpanguha sa pamilya sa mga isdang sardines, herrings ug mackerels.

Ang maong mga isda sa binisaya pa, pamilya sa mga andohaw ug tamarong (mackerel); tuloy, mangsi o malalangsi ug tamban (sardines, herring).

Si BFAR-7 regional director Andres Bojos nipahibalo niini atol sa gihimong Kapihan sa Isla nga usa ka media forum alang sa malungtarong abot gikan sa pagpanagat.

Matud pa ni Bojos nagsugod ang pagdili pagkuha niini nga matang sa mga isda niadto pang Nobiyembre 15 ug matapos kini karong Pebrero 15 ug dili sa Marso 15 sa sunod tuig. Giesplikar ni Bojos nga gikan sa buwan sa Nobiyembre hangtud sa Pebrero, namihod na ang maong mga matang sa isda diha sa Visayan Sea.

"Mao ni ang time nga ting-itlog sa mga isda. This is the time to replenish the fish," pasabot pa ni Bojos.

Dili na bag-o ang fish ban sa Visayan Sea, sulod sa nakalabay nga tulo ka tuig gipatuman ang maong commercial fishing ban.

Hinuon giklaro sa BFAR-7 nga dili maapektahan ang panginabuhian sa mga gagmay nga mga mananagat niini tungod kay dili sakop sa commercial fishing ang mga municipal waters.

Ang makonsiderar nga commercial fishing mao kadtong migamit og mga panagatan nga molapas og tulo ka tonelada ang gibug-aton.

Matud pa ni Bojos, ang mga gagmay nga panagatan mahimo gihapong makapanagat diha sa municipal waters ug dili did-an pagkuha niini nga matang sa mga isda mao nga makabaligya gihapon sila niini diha sa mga kamerkadohan.

Sakop sa maong commercial fishing ban sa Visayan Sea ang Danao River,  kinatumyang bahin sa Escalante sa amihanang bahin sa Bacolod, ug sidlakang bahin sa Sta. Fe ug amihanang bahin sa Madridejos hangtud sa Higantes Island sa Carles, Iloilo, Caluya Island sa Oriental Mindoro.

Kadtong mga masakpang nakalapas niini makamulta og P100,000 ngadto sa P500,000  o pagkabilanggo og unom ka tuig ug pagkasakmit sa ilang nakuhang mga isda ug gamit sa panagat.

Si Gloria Estenzo Ramos, Vice President sa Oceana Philippines nagkanayon nga usa kini ka pamaagi aron masiguro nga pirmeng adunay makuhang isda ang mga nanginabuhi sa dagat, gikan sa gagmay nga mananagat hangtud na sa mga commercial fishing industry.

Ang Visayan Sea nalakip sa 13 ka mga abunda unta sa isda kaniadto dinhi sa nasud nga na-overfished na tungod sa walay puas nga pagpanagat ug wala makapangitlog ang mga isda hinungdan nga nihit na ang makuha kaniadto.

Tungod sa kanihit, ang mga mananagat dagko o gagmay, napugos na paglawig sa mas lagyong lugar ug ang uban mosud sa mga municipal waters sa ubang lungsod aron lang makapanagat apan sagad kanila mangadakpan. (BANAT NEWS)

ANDRES BOJOS ANG ANG VISAYAN SEA BUREAU OF FISHERIES AND AQUATIC RESOURCES CALUYA ISLAND DANAO RIVER HIGANTES ISLAND ISDA MGA NGA VISAYAN SEA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with