Pagkadato sa Lalawigan sa Sugbo gisaway

CEBU, Philippines - Human gibutyag sa Commission on Audit nga ang Sugbo ang pinakadato nga probinsya sa nasud, gisaway kini ni gubernatorial candidate Winston Garcia tungod kay gihulagway niya kining pagmatuod nga kini  way gibuhat ang administrasyon ni Gob. Hilario Davide III.

Matud niya nga ang surplus nga nahimo sa probinsya angay pa gani nga ikauwaw taliwala niining mga insidente nga nahitabo sa mga tambalanan nga gidumala sa probinsya.

Gihimo niyang sanglitanan ang nahitabo sa Barili District Hospital diin usa ka pasyente ang wala dayon madala sa tambalanan sa Cebu City tungod gipangayoan ang pamilya niini og P1,500 nga panggasolina sa ambulansya.

Apan kini gihimakak sa tagdumala sa Barili District Hospital nga nagkanayon nga ang maong ambulansya nga gihisgutan ni Garcia iya sa munisipyo sa Barili ug dili sa tambalanan.

Gihisgutan usab ni Garcia ang nahitabo sa Minglanilla District Hospital nga diin  adunay mga pasyenteng bata nga namatay ug ang uwahi kadtong usa ka tuig kapin nga batang babaye nga namatay nga wa gyuy natabang ang mga doktor kay wala silay ikapalit og tambal nga ilang gireseta.

 “A wealthy province that allows a child in Minglanilla to die because government cannot provide P700 worth of medicine is criminal neglect. What use is government savings when people in the province are dying?” sigon ni Garcia.

Nagkanayon si Garcia nga ang probinsya dili usa ka bangko.

“Every single government revenue should be spent for the needs of the people,” dugang ni Garcia.

Iyang gipanaad nga kun siya modaog pagka- gobernador sa Sugbo, himuon niyang libre ang serbisyo pangkalawasan sa probinsya aron di na mahitabo ang susamang mga insidente sa ospital.

Apan si Davide sa iyang bahin mibutyag nga ang probinsya mas bintaha karon itandi dihang ang igsuon ni Winston nga si kanhi gobernador ug karon Kongresista Gwendolyn Garcia pa maoy namuno.

Matud ni Davide, sa panahon ni Gwendolyn, hapit mahubas ang panudlanan sa probinsya.

Dugang niya nga ang kahimtang karon sa probinsya resulta lamang sa maayong pagdumala sa kwarta sa katawhan.

“We don’t need Garcia’s false sense of self and all baggage that comes with it. We need someone who can bring us all together to work together. That is not Winston nor Gwen,” sigon ni Davide.  (BANAT NEWS)