Mosalmot sa strike gibaharan ni Radaza
CEBU, Philippines – Gibaharan ni Lapu-Lapu City Mayor Paz Radaza nga papahawaon sa terminal ang mga PUJ drivers nga moapil sa mga "surprise strikes."
Kini human nadismaya si Radaza sa nahitabo niadto’ng Martes tungod sa ka daghang naangin nga mga pasahero kinsa na-late sa trabaho ug klase.
"Dili na pa-parkingan. Kung ma-usab, di na pagamiton sa terminal," matud ni Radaza.
Sa nahitabo’ng strike, matud ni Radaza nga wala sab nasayud si Frank Brazil, pangulo sa City Traffic Management Systems.
Dali hinuon nga nakapadagan sa mga government buses ug gitataw ni Radaza nga ang taga Land Transportation Franchising and Regulatory Board niadto sa terminal ug nihatag og special permit sa ila’ng buses aron sa paghatud sa mga pasahero sa ila’ng destinasyon.
Tungod kay una kini nahitabo sa administrasyon ni Radaza ang "surprise strike," kini nihangyo sa mga PUJ drivers nga mahimo sila’ng mopabuhagay sa ila’ng concerns.
"They should express their concerns and dapat makig-coordinate gyud sila sa LGU about their plan," paambit ni Radaza. Apan si Greg Perez, pangulo sa Pinagkaisang Samahan ng mga Tsuper at Operators Nationwide (PISTON) Cebu, nagkanayon nga nagpahibawo sila sa gipahigayong strike apan wala sila'y formal letter nga gihimo.
Dugang ni Perez nga sa wala pa nahitabo ang strike, nanghatag sila og leaflets ug nanawagan sa radyo ilabi na ang pag-rekoreda sa kadalanan.
Matud ni Perez nga niadto’ng adlawa, 200 ka PUJ drivers lakip na niini ang mga drivers sa siyudad ang nagmartsa gikan sa dakbayan sa Mandaue padulong sa Land Transportation Office-7 sa Cebu City.
Ang Joint Administrative Order, sobra nga multa sa mga PUJ ilabi na ang pagpatangtang sa mga karaan nga modelo sa jeepneys mao’y gipanawagan sa PISTON, matud ni Perez. – /GMR) (BANAT NEWS)
- Latest
