Menor mireklamo nga gisumbag sa bana sa kagawad

CEBU, Philippines – Menor nga drayber og motor nga gipasanginlang maoy hinungdan sa siningkiay sa tulo ka motor mireklamong gisumbag sa bana sa kagawad sa barangay nga usa sa nalambigit sa disgrasya diha sa barangay Don G. Antigua sa Borbon.

Ang gipasanginlang nanumbag mao si Julius Pasaol, bana ni barangay Sagay Kagawad Zenaida Pasaol nga naangol sa maong aksidente. Samtang ang nireklamo mao ang 16-anyos nga batan-on nga naangol usab sa aksidente ug si Rechie Estañero, 21.

Si Police Officer 1 Raffe Tejares, desk officer sa Borbon Police Station nga nahinabi sa Banat News miingon nagsunod ang tulo ka motor niadtong tungora.

Nag-una nila si kagawad Pasaol, dayon gisundan ni Estañero ug kataposan ang menor de edad. Gikatahong misuway og overtake kang Estañero ang menor apan tungod kay dunay kasugat nga laing motor mibalik kini sa iyang pwesto apan nasingki siya sa motor ni Estañero kinsa napunta usab sa motor sa kagawad hinungdan sa pagkatumba sa tulo.

Tungod kay wa kaayo magrabehi ang duha ilang gitabang ang kagawad apan gikatahong nasuko kini ug wa magpaduol kanila. Apan dihang naabot ang bana niini ug sa ambulansya sa dihang dad-on na kini sa tambalanan, gikatahong gisumbag sa bana ang likod sa menor de edad ug si Estañero apan nakapanagang kini. Sumala pa ni Tejares nga ang tulo pulos way mga lisensya. - /EIM) (BANAT NEWS)