Nagpatay kang Sharpe, anak gikiha na
CEBU, Philippines – Gikondena sa hunta probinsiyal sa Sugbo ang linuog nga pagpatay sa inahan ug anak sa barangay Tungkil, lungsod sa Minglanilla sa nilabay’ng semana.
Kagahapon napasaka na usab sa Provincial Prosecutor’s Office ang duha ka kaso’ng murder ug robbery batok sa mga suspek ug wala’y girekomendar nga piyansa.
Si Virginia Sharpe ug ang 11-anyos nga anak nga si Mica Ella gilubong sa septic tank sulod sa balay human sila gipatay.
Ang suspek nga si Manuel Labrador niangkon nga siya ang nipatay sa inahan ug anak tungod kay duna siya’y utang nga P25,000 kang Sharpe.
Si Labrador nagtrabaho isip panday sa gipaayo nga balay sa pamilya’ng Sharpe ug giingong niadto’ng higayuna ubos sa impluwensiya sa ginadili’ng drugas.
Lakip sa mga suspek kinsa nitabang sa paglubong sa patay’ng lawas sa mga biktima mao sila si George Baquiran ug Estelito Recamora kinsa usa kanila giingong nigamit sab og ginadili’ng drugas atol sa hitabo.
Si Bokal Julian Daan sa una’ng distrito diin sakop ang lungsod sa Minglanilla mao’y niduso sa resolusyon sa pagkondena sa hitabo.
Si Daan nanawagan usab sa kapolisan dili lang sa lungsod sa Minglanilla sa higpit nga kampaniya batok sa ginadiling drugas. – /GMR) (BANAT NEWS)
- Latest
