Talisay City wa nay budget, mga gwardiya gitangtang

CEBU, Philippines – Sugod kagahapong adlawa wala nay security guard nga nagbantay sa Talisay City Hall human gikatahong wa nay ikasweldo kanila.

Miluwat og executive order niadtong Marso 17, 2015 si Talisay City Mayor Johnny delos Reyes nga nagpahibaw kang Baltaire Balangauan ang presidente sa Black Pearl Security Agency nga sugod kagahapong adlawa putlon na ang serbisyo sa iyang ahensya.

Gumikan kini sa paglaslas sa konseho sa budget niini gikan sa P17.5 milyones ngadto na sa P3.5 milyones alang karong tuiga 2015.

Sumala pa nga limitado lamang ang maong budget niadto lang Pebrero 2015 nga pangsweldo sa maong mga  gwardiya.

Gipahibaw sa mayor nga wala usab kini nakakuha og supplemental budget alang sa 1st Quarter karong tuiga hinungdan nga gi-terminate na lamang ang serbisyo sa maong security agency sugod sa Marso 17, 2015.

Ang 91 ka mga security guards midangop sa mayor kagahapon aron klarohon ang ilang status.

Si Kevin (apelyedo wa ibutyag) usa sa mga gwardiya mipadayag sa Banat News nga nasagmuyo sila gumikan kay napagan sila sa away politika sa konseho ug sa mayor.

"Maayo man na sila kay mga dato man, pukawon lang sa katabang nga mangaon na ready na ang pagkaon, samtang kami halos 2- oras naningkamot motrabaho aron ipalit og bugas ibuhi sa pamilya,” asoy pa sa gwardiya.

Ang Civil Security Unit (CSU) na lang mao unay temporaryong mohatag og seguridad sa mga pasilidad sa dakbayan sa Talisay. – /EIM) (BANAT NEWS)