Isla sa Kinatarcan wa pasagdi —Tribunalo
CEBU, Philippines – Giklaro sa hepe sa Task Force Paglig-on sa Probinsya sa Sugbo nga wala mapasagdi ang Isla sa Kinatarcan sa Santa Fe gikan sa Comprehensive Rehabilitation and Recovery Plan.
Matud ni Baltazar Tribulano, nga ang Kinatarcan sama ra sab sa uban nga barangay nga naglisod pa sa pag-recover gumikan sa pagkalangan sa pag-abot sa mga pundo nga alang unta sa rehabilitasyon.
Si rehabilitation czar Panfilo Lacson sa sayo pa miingon nga ang isla sa Kinatarcan nabiyaan gikan sa recovery plan. Gikatakda siyang mopadala og tawo sa maong isla aron makapahigayon og census aron sila matabangan.
Si Rommel Osayan, lomulupyo sa Kinatarcan nga nakahinabi sa Banat News mibutyag nga adunay mga naabot nga hinabang ngadto kanila apan kadaghanan gikan sa mga non-governmental organizations ug ang uban pinili ra ang gipanghatagan.
Sumala pa niya dunay relief goods nga gihatag ang Department of Social Welfare and Development apan wala pay bisan usa nga nakahatag kanila og housing materials.
“Naay P6,000 nga gipanghatag ang Oxpam (NGO) pero wa na mi tagai kay nakautang na man mi para ipaayo sa among bangka, pero kami lagi ang mobayad sa among giutangan.
Kinahanglan man namo mangutang kay mao man nay among panginabuhian aron maka-recover,” pasabot pa niya, apan ang ilang makuha igo ra sa usa ka adlaw.Sa pagkakaron, problema pa gihapon nila ang housing materials. – /EIM) (BANAT NEWS)
- Latest
