Babaye nipakauwaw sa polis gipriso

CEBU, Philippines – Gibalhug sulod sa prisohan ang usa ka babaye human gipasanginlang nitamparos ug nipakauwaw sa usa ka polis. Ang babaye naila nga si Sitty Amiaza Lao, 27-anyos, taga sitio San Lucas, Biasong, dakbayan sa Talisay kinsa gibalhug sa Talisay City Police Station detention cell.

Matud ni Police Officer 3 Jason Del Campo nga gitamparos, gigisi ang senina ug gipakauwawan ni Lao si SPO1 Francisco Recaforte, sakop sa Special Weapon and Tactics (SWAT) sa dakbayan sa Sugbo.

Apan si Lao mihimakak tungod kay matud niya nga nagsugod ang maong gubot dihang nakit-ang nag-away ang iyang anak ug ang anak ni Recaforte.

Matud ni Lao nga nilaban ang iyang manghod nga si Abdul Muhammad sa iyang anak tungod kay gidasmagan kini sa anak ni Recaforte.

Gidugang ni Lao nga unang gikulata sa polis mao ang iyang manghod ug dayun giduol siya ug gipatalikod ug ginusnos ang nawong sa lapok dayon gipusasan.

Si Lao mipasangil nga gihadlok sila nga naay katungod si Recaforte sa pagdakop tungod kay polis kini.

Giingong nibahad usab si Recaforte sa pamilya ni Lao nga pamusilon ang manghod niini nga si Abdul hinungdan nga ilang gipasibat.

Kusganong gipadayag ni Recaforte nga mokiha sila sa pamilya ni Lao.  – /GMR) (BANAT NEWS)