Kaso labot sa oil spill sa Cordova gisang-at

CEBU, Philippines - Pormal na nga misang-at og kaso ang kampo ni Cordova Mayor Adelino Sitoy uban sa mga mananagat sa lungsod batok sa duha ka shipping companies.

Lakip sa gikiha ang mga ahensiya sa Department of Environment and Natural Resources, Maritime Industry Authority ug Philippine Coast Guard.

Ang kaso nga gipasaka may labot sa nahitabong oil spill sa lungsod human sa nahitabong panagbangga sa M/V St. Thomas Aquinas ug M/V Sulpicio Express Siete sa kadagatan sa Lawis Ledge sa dakbayan sa Talisay usa ka tuig na ang nakalabay.

Matud ni Atty. Benjamin Cabredo, abogado ni Sitoy, nga gilakip nila sa pagkiha ang DENR, MARINA ug PCG tungod kay ilang nakita nga wala’y gihimo ang maong mga ahensiya aron mahibalik sa normal nga sitwasyon ang lungsod sa Cordova human maapektohi sa oil spill.

Gidugang ni Cabredo nga ang maong tulo ka ahensiya sa gobyerno adunay mandato hinungdan nga apil kini sa gikasohan aron buhaton sa mga ahensiya ang ilang trabaho. Nasayran ang lungsod nangayo og tres milyones dolyares nga bayad sa tanang gasto aron mahibalik ang kabakhawan ug marine eco-system diin ang maong kantidad gibase nila sa Marina Memorandum Circular 2009-22. Gawas niini, nangayo usab sila og laing P85 milyones isip reimbursement ngadto sa munisipyo sa Cordova ug sa mga mananagat nga naapektohan sa oil spill.

Si Sitoy ug mga mananagat sa ilang bahin mibutyag nga gitun-an gyud nila ang mga kaso nga ilang gisang-at ug nanghinaut nga pinaagi niini mahibalik na sa normal ang tanan. Samtang sa text message nga gipadala sa DENR-7 ilang gibutyag nga mihimo sila og aksyon labot sa maong hitabo ug gani ilang gimanduan ang 2GO Company sa pagbayad og danyos.  (BANAT NEWS)