Dunay mga batang gipabaligya og drugas

CEBU, Philippines - Sama sa Cebu City Police Office, nagtuo usab ang hepe sa Talisay Police Station nga si Superintendent Reycel Carmelo Dayon nga dunay mga batang gigamit karon sa mga ilegalista sa siyudad aron maoy mohimo sa mga krimen ilabi na sa pagpamaligya og ilegal nga drugas.

Si Dayon kinsa miduaw sa mga public schools sa dakbayan subay sa Police Community Relations Month mibutyag nga nagtuo siyang dunay mga batang gigamit sa pagpamaligya og ginadiling drugas ngadto gihapon sa kabataan diha sulod sa tunghaan.

Tungod niini, si Dayon mibutyag nga gusto niyang matudloan ang mga bata kun unsay buhaton kun duna sila’y mahibaw-ang susama niini nga ilegal nga kalihokan.

Samtang nagtuo si Dayon nga  dunay mga batang nanulod og gangs kini tungod sa mga batang “bullies” o kadtong kusog manaog-daog sa kaubang mga estudyante.

Ang buwan sa Hulyo mao ang Police Community Relation (PCR) month diin usa sa mga kalihukan nga ilang buhaton mao ang pagbisita sa mga tunghaan sa siyudad aron pahimangnoan ang mga estudyante nga magmabinantayon aron sila malikay sa ginadiling drugas ug uban pang mga bisyo. - /EIM) (BANAT NEWS)