Porno DVD ug magazines gisakmit sa CAIB

CEBU, Philippines - Nasakmit sa Cebu City Anti–Indecency Board (CAIB)  ang kapin 391 ka mga pornographic DVD’s  ug gatosan usab ka mga gihulagway nilang bastos nga basahon gikan sa mga dagkong malls sa dakbayan.

Sa miaging buwan nakakuha og kapin 237 ka mga magazines ang CAIB sa dakong mall sa dakbayan.

Ang maong tindahan sud sa mall nasakmitan og FHM magazines, Cosmopolitan Magazines, Maxim ug Kamasutra.

Samtang ang mga DVD’s nakuha sa downtown Colon apan walay nadakpan nga tag-iya ang awtoridad tungod kay nahurot og panagan ang mga tindera sa giladlad lang nga pornographic DVD’s.

Matud ni Dr. Lucille Mercado, pangulo sa CAIB, maglisod g’yud sila pag-ila sa tag-iya sa maong mga stalls tungod kay magsige man og ilis-ilis og pangalan ang tag-iya niini. Sigon sa ilang gihimong monitoring ilang nasuta nga ang maong mga pornographic materials diri ra sa Sugbo gibuhat.

Dako ang ilang pagtuo nga aduna na’y mga makina diri nga maoy mobuhat sa maong mga pirated porno DVDs, tungod kay ang mga covers sa DVD ug mga blank DVD’s nga ilang makuha sa ilang pagpanakop nga gi-andam na sa mga mamuhatay.

Iyang gidugang nga wala’y problema alang kanila ang pag-ila sa mga manindahay kay naa sila’y mga tawo nga andam nga mogiya kanila og asa apan di na kini kabahin sa ilang hurisdiksyon.

Mensahe ni Mercado alang sa mga manindahay ug mamuhaty og mga pornographic materials nga magpadayon ang paggukod kanila.

Ang pagpamaligya ug pagpang apod-apod og mga pornographic materials kalapasan sa City Ordinance 1408 o Anti- Decency Ordinance. Ang masakpan nga nagbuhat sa ingon mamahimong  makamulta og P5,000 administrative fine o mapriso og unom hangtod sa 12 ka tuig ug makamulta og kapin P6,000 hangtod P12,000. (BANAT NEWS)