Nadugta na nga patay’ng lawas napalgan

CEBU, Philippines - Nadugta na nga patay’ng lawas sa usa ka lalaki ang napalgan sa Barangay San Miguel, lungsod sa Cordova niadtong Domingo sa gabii.

Ang biktima nailhan nga si Alvin Andales, 31, minyo ug residente sa Barangay Bangbang sa maong lungsod.

Giingong baho ug nadugta na ang patay’ng lawas ni Andales nga napalgan sa kasagbutang bahin sa lugar.

Sa pasiunang imbestigasyon ni PO2 Vilma Degamo sa Cordova Police Station nasuta nga may samad pinusilan sa dughan ang biktima.

Duha ka anggulo ang gisubay sa kapolisan sa kamatayon ni Andales.

Usa niini ang pagkalambigit sa ilegal nga drugas ug ang grabeng kasuko sa mamumuno kaniya gumikan sa giingong ka maldito sa biktima.

Impormasyon nga nadawat sa kapolisan gikan sa usa ka babaye nagkanayun nga si Andales misulti nga pabantayon kay dunay buot mopatay kaniya hinungdan nga iya nang gipasidan-an ang iyang inahan nga hipuson lang og tarung ang iyang patay’ng lawas.

Wala hinoon motug-an ang biktima sa dihang buhi pa kung kinsa ang nagtinguha sa iyang kinabuhi.

Nasuta usab nga tiggamitan ug tigbaligya og ginadiling drugas ang biktima ug posibleng wala kini maka-remit sa iyang halin. Giingong daghan ang nasuko sa biktima gumikan sa kabadlungon niini sa ilang lugar. (BANAT NEWS)