Iho, seahorse nasakmit gikan sa duha ka panagatan
CEBU, Philippines - Nasikop sa Anti-Illegal Fishing Task Force sa Kapitolyo ang mga crew sa duha ka panagatan nga nagkarga og mga gituohang ‘endangered species’ ug mga ilegal nga gamit sa pagpanagat sa kadagatan sa lungsod sa Daanbantayan niadtong Miyerkules.
Nasikop ang 16 ka crew sa F/B Angel May nga gipanag-iya ni Alma Arimas. Nakit-an sulod sa maong sakayan ang upat ka patay’ng seahorse ug usa ka nurse shark. Nakuha usab sa task force ang 40 ka banyera sa lain-laing klase sa isda.
Samtang lain usab nga 15 ka crew sa F/B Laura-Rowella ang gisikop nga adunay kargang duha ka seahorse ug usa ka iho. Gipanag-iya ang maong sakayan ni Roy Vejandre.
Gawas sa iho ug seahorse nakuha usab ang 150 ka banyera nga mga isda.
Matud pa pulos gikan sa siyudad sa Cadiz sa Negros Oriental ang duha ka panagatan. Matud sa team leader sa maong task force nga si Loy Anthony Madrigal nga ilaha pang sutaon kun endangered na ba gyud ang maong mga iho.
Kun masuta nga endangered species na ang mga nakuha nilang mananap sa dagat hayan kasohan sila og kalapasan sa Republic Act 8550 kon ang Philippines Fisheries Code of 1998. Dugang pa ni Madrigal nga nakuha usab gikan sa sakayan sa F/B Laura-Rowella ang mga active gears nga kalapasan usab sa Fisheries Code. (BANAT NEWS)
- Latest