Sundalo nga hubog nagmaoy

CEBU, Philippines - Gipaubos karon sa "camp restriction" ang usa ka sakop sa Philippine Air Force (PAF) nga nagmaoy ug nangulata’g tawo sulod sa usa ka KTV bar sa Barangay Marigondon, Lapu-Lapu kaniadtong Domingo sa kadlawon.

Si Sgt. Brucel Olmido, 34, minyo, nga nagpuyo sa Airmens Village sulod sa Mactan Benito Ebuen Air Base sakop sa Tenant unit sa 560th Air Base Wing.

Gidakop si Olmido ug gipaubos na sa camp restriction human kini mikulata sa usa ka construction worker nga si Alex Nacorda, hingkod ang panuigon ug molupyo sa Barangay Basak, dakbayan sa Lapu-Lapu.

Sa imbestigasyon sa kapolisan nahibaw-an nga si Sgt. Olmido uban sa iyang higala nga si Rafael Policarpio misulod sa bar ug nagmaoy. Si Nacorda maoy nakursonadahan ug gikulata’g maayo sa sundalo mao nga nakuyapan ang construction worker.

Pagresponde sa kapolisan si Sgt. Olmido ug Policarpio gidala sa presento sa kapolisan ug gitanggong sa bilanggoan.

Wala danti ug usa ka oras dali nga gi-rescue si Olmido sa iyang mga kauban nga sakop sa PAF.

Samtang si Air Force Lt. Col. Mariano Jesus Guevarra, ang Public Information Officer sa PAF, miingon nga mihimo usab sila og linain nga imbestigasyon sa maong hitabo ug maoy hinungdan nga gipaubos karon sa camp restriction si Sgt. Olmido.

Gipasidan-an ni Guevarra ang mga sundalo sa Air Force nga gidili kanila ang pagsud og mga imnanan, apan kun dili gyud kini malikayan, kinahanglan nga dili sila mohimo ug malambigit sa kagubot ilabi na kung dunay sibilyan nga masakitan. (/RUB)(BANAT NEWS)