Upat ka ‘escorts’ sa gihusay sa barangay gidakop

CEBU, Philippines - Inay husayon, sa prisohan hinoon napunta ang mga buot untang husayon sa barangay hall sa Mabolo ning dakbayan sa Sugbo dihang ang upat kanila nasakpang nagdala diay og mga armas, atol unta sa ilang hearing sa miaging gabii. Ang gipangsikop sulod sa barangay hall mao sila si Dolor Damasin, 35, taga Babag 2, Cordova Cebu, nga nakuhaan og .38 revolver; Danilo Fernandez, 35, taga Mananga, Tabunok, Talisay City, nakuhaan og .38 revolver; Friscillo Cabusas Jr, 35, taga Babag 2, Cordova, nakuhaan og kutsilyo; ug Roger Capricho, 40, taga Lawaan 2, Talisay City, nga nakuhaan og nunchaku.

Matud pa ni Kapitan Reynaldo Ompoc nga aduna unta’y himoon nga hearing sa maong barangay hall ug ang upat nanguyog isip “escorts” sa ilang mga kaubang husayon. Apan usa ka Kenneth Burgos Uy, 24, nagpuyo ra sab sa maong barangay ang nakabantay sa usa sa mga suspek nga dunay armas hinungdan nga misumbong kini sa mga tanod ug sa kapolisan ug nangadakpan. (BANAT NEWS)