^

Online libel OK ra apan silot nga pagkapriso angay wagtangon — CCPC

Edwin Ian Melecio (Banat) - April 11, 2014 - 12:00am

CEBU, Philippines - Gipasar sa Cebu Citizen’s Press Council ang gisugyot nga resolusyon sa grupo bahin sa desisyon sa Korte Suprema nga nagdeklarar sa online libel nga Constitutional.

Niadtong Marso 13, 2014, ang Cebu Media Legal Aid (CEMLA) giawhag sa CCPC executive director Atty. Pachico Seares nga tun-an ang impact sa maong bag-ong desisyon sa mga sakop sa media ug online media ilabi na sa isyu sa online libel. Una nang giuyonan sa CCPC niadtong Marso, 2012 nga uyonan nga ipabilin libelo isip usa ka krimen apan wagtangon lang ang silot nga pagkabilanggo subay kini sa nakuhang reaksyon gikan sa Cebu print ug broadcast media.

Atol sa panagtigom kagahapon nga gitambongan sa mayoriya sa mga sakop sa board sa CCPC subling miuyon sa posisyon niini niadtong 2008 ug 2012 nga suportahan ang tinguhang wagtangon ang silot nga pagkabilanggo tungod kay gamiton kining panghasol-hasol ug pit-on ang mga sakop sa media kun duna kini iyagyag nga mga kahiwian batok sa mga opisyal sa gobiyerno.

Giapelar usab sa CCPC sa mga magbabalaod nga ang venue sa husay sa libel adto lang gyud himuon sa lugar diin mahimutang ang media outlet o ang legal residence sa tigbalita nga gikiha, tungod kay sa pagkakaron, ang venue gihimong panghasol sa mga nangreklamo pinaagi sa pagkiha kanila sa mga hilit o kaha lagyo nga mga dapit.

Giawhag usab sa CCPC ang Kongreso nga klaruhon ang mga pangutana kabahin sa “repeated libel” kay mo-aplay man kini sa regular media ug sa online media.

Si Atty. Ethelbert Ouano, legal consultant sa Cebu Bloggers Society miingon nga pinaagi sa internet migamay ang kalibotan ug nawala ang bili sa mga hurisdiksyon.

Matud pa niya tungod sa R.A. 10175 o Cybercrime Law nabutang sa peligro nga mapriso ang 30 milyones ka mga Filipino nga internet users samtang ang ubang users gikan sa ubang nasud dili bisan pareho ra sila og gibuhat apan gi-‘decriminalized’ ang libel.

Samtang ang retiradong hukom nga si RTC Retired Judge Meinrado Paredes kini usa usab sa mga speakers miklaro nga dili kalapasan sa maong balaod ang igo lang mi- like, mi-repost, o mi-share sa orihinal nga gi-post. Apan makalapas lang sila niini kun ilang dugangan ug samotan pa ang makadaot nga alegasyon sa tawong gihisgutan.  (BANAT NEWS)

CEBU BLOGGERS SOCIETY CEBU CITIZEN CEBU MEDIA LEGAL AID CYBERCRIME LAW ETHELBERT OUANO KORTE SUPREMA MEDIA NIADTONG MARSO
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with