Med Rep nga nakapatay’g tinun-an gikiha na

CEBU, Philippines - Kadtong drayber sa kotse nga nakadam-ag ug nakapatay og tulo ka tinun-an ingon man nakapaangol sa laing tulo didto sa Boljoon sa miaging semana gipasakaan na og kaso nga kriminal didto sa hukmanan.

Ang kapolisan sa Boljoon misang-at og kaso nga Reckless Imprudence Resulting in Multiple Homicide didto sa Cebu Provincial Prosecutor’s Office batok sa 26-anyos nga si Al-Dhinier Hadjula Sanaani.

Atol sa pasiuna nga imbestigasyon sa fiskaliya, ang drayber sa kotse nga usa ka medical representative mihukom nga dili na siya moatubang og preliminary investigation nga nagpasabot nga uyon siya nga isang-at dayon ang kaso sa hukmanan.

Tumong sa akusado nga kun masang-at na sa hukmanan ang kaso makabutang dayon siya og pyansa alang sa iyang temporaryo nga kagawasan samtang magpadayon ang paghusay sa kaso sa korte.

Matud ni Prosecutor Rustom Presas nga mahimong mapiyansahan ang maong kaso apan adto kini ipasaka ug husaya sa Regional Trial Court (RTC) nga nagbase sa lungsod sa Argao. Ang mga biktima naglakaw pauli na sa ilang tagsa-tagsa ka balay duol sa taytayan sa Boljoon dihang kalit sila nga gidam-agan sa awto nga gimaneho ni Sanaani.

Ang nangamatay mao sila si Judy Ann Lomera, 18; Joanne Marie Romero ug Cristy Marie Estella, 16.

Ang mga nangaangol mao sila si Nice Ancheta, 15; Melissa Mendez, 14; ug Kynth Marie Mendez, nagtungha sa Boljoon National High School.

Si Sanaani may kaubang babaye sa kotse atol sa hitabo. Si Kristine Joyce Batucan, 26, nga laing medical representative ug taga Barangay Guadalupe, dakbayan sa Sugbo nakasinati usab og samad.

Ang kapolisan miingon nga laing kaso nga Reckless Imprudence Resulting in Physical Injuries ipasaka usab batok ni Sanaani tungod sa pagkaangol sa laing tulo ka biktima. (BANAT NEWS)