Evacuee naghikog kay dugay nauli ang kapuyo

CEBU, Philippines - Usa ka batan-ong babaye nga evacuee gikan sa dakbayan sa Tacloban ug nagpuyo na sa iyang iyaan diha sa dakbayan sa Lapu-Lapu  gituohang naghikog pinaagi sa paghigot og pisi sa iyang liog sa miaging adlaw.

Si PO3 Lydo Pinos sa Homicide Section sa kapolisan sa maong dakbayan miila sa namatay nga mao si Akira Mae Patalingjug, 18,  dalaga apan adunay kapuyo nga temporaryong nagpuyo sa panimalay sa iyang iyaan sa Sacred Heart Center sa barangay Gun-ob, dakbayan sa Lapu-Lapu. Matud pa ni Pinos nga nag-inusarang nahibilin ang biktima sa balay sa iyaan kay ang kapuyo niini milakaw kay nangaplay og trabaho sa dakbayan sa Mandaue ug milakaw usab ang iyaan uban ang 7- anyos niining anak.

Nakurat na lang ang iyaan sa iyang pag-uli nga nagbitay na ang pag-umangkon gikan sa ibabaw nga bahin sa balay ug may pisi sa liog.

Dali nila kining gitabang ug gidala sa mga sakop sa Emergency Rescue Unit Foundation (ERUF) sa Lapu-Lapu  City Hospital apan gideklarar kini sa mga doktor nga dead on arrival.

Matud ni Pinos nga ang iyaan miingon nga pipila na ka adlaw ang nakalabay  dihang nadunggan niini ang pag-umangkon nakig-estorya sa iyang kapuyo sa cellphone nga maghikog kini kun kanunay kini nga madugay sa pagpauli gikan sa pagpangaplay niini og trabaho.  (BANAT NEWS)